पाकिस्तानच्या (Pakistan) कराची विद्यापीठात मंगळवारी मोठा स्फोट झाला. या स्फोटात अनेक जण जखमी झाल्याची भीती व्यक्त केली जात आहे. पाकिस्तानी मीडियाच्या हवाल्याने पीटीआयने हे वृत्त दिले आहे. मात्र, या स्फोटाचे कारण अद्याप समोर आलेले नाही.

मीडिया रिपोर्ट्सनुसार, हा स्फोट कराची (Karachi) विद्यापीठाच्या कॅम्पसमध्ये एका कारमध्ये झाला. ज्यामध्ये चार जणांचा मृत्यू झाला असून अनेक जण जखमी झाले आहेत. जिओ टीव्हीने दिलेल्या माहितीनुसार, कराची विद्यापीठाच्या कन्फ्युशियस इन्स्टिट्यूटजवळ एका व्हॅनमध्ये स्फोट झाला.

प्रसारमाध्यमांनी सांगितले की, स्फोटानंतर बचाव आणि सुरक्षा यंत्रणा घटनास्थळी पोहोचल्या असून त्यांनी तात्काळ बचाव कार्य सुरु केले आहे. पोलीस (Police) सूत्रांनी दिलेल्या माहितीनुसार, ज्या व्हॅनमध्ये हा स्फोट झाला त्यात सात ते आठ जण होते. मात्र, मृतांचा नेमका आकडा अद्याप देण्यात आलेला नाही.