Kenya: केनिया या आफ्रिकन देशातून एक धक्कादायक घटना समोर आली आहे. या देशात 45 हून अधिक लोकांनी अंधश्रद्धेच्या विळख्यात अडकून आपला जीव दिला आहे. एका पुजाऱ्याच्या सांगण्यावरून या लोकांनी उपाशीपोटी सामूहिक आत्महत्या केल्याचे सांगण्यात येत आहे.

पुजाऱ्याच्या सांगण्यावरून जवळपास 47 जणांनी उपाशीपोटी आत्महत्या केली आहे. स्थानिक पोलिसांनी पाळकाच्या मालकीच्या जागेतून त्यांचे मृतदेह बाहेर काढले. केनियातील शाकाहोला येथून पोलिसांना अधिक मृतदेह मिळत असल्याने अंधश्रद्धेमुळे जीव गमावणाऱ्यांची संख्या वाढण्याची शक्यता आहे.

गुड न्यूज इंटरनॅशनल चर्चच्या पास्टरच्या सांगण्यावरून या लोकांनी सामूहिक आत्महत्या केल्याचे सांगण्यात येत आहे. गेल्या 3 दिवसांपासून केनियातील स्थानिक पोलिस घटनास्थळावरून मृतांचे मृतदेह बाहेर काढत आहेत. केनियाचे मालिंदी काउंटी पोलिस प्रमुख जॉन केंबोई यांनी या घटनेची माहिती दिली.

पास्टर पॉल मॅकेन्झी यांच्या मालकीच्या जमिनीवर आणखी कबरी खोदण्यात येणार असल्याचे त्यांनी सांगितले. मोठ्या प्रमाणात मृतदेह सापडल्यानंतर 14 एप्रिल रोजी पुजारीला अटक करण्यात आली होती. पोलीस प्रमुखांनी याबाबत माहिती दिली.

मिळालेल्या माहितीनुसार, गुप्त माहितीच्या आधारे स्थानिक पोलिसांनी केनियातील मालिंदी येथील पाद्रीच्या मालमत्तेवर छापा टाकला. यादरम्यान पोलिसांना एकामागून एक मृतदेह मिळत गेले. केनिया डेली वेबसाइटनुसार, लोक उपासमारीने मरण पावले हे सिद्ध करण्यासाठी पोलीस घटनेत सापडलेल्या मृतदेहांचे डीएनए नमुने गोळा करत आहेत.

पास्टर पॉल मॅकेन्झी यांचे नाव अंधश्रद्धेशी संबंधित प्रकरणात येण्याची ही पहिलीच वेळ नाही. याआधीही 2019 मध्ये दोन मुलांच्या मृत्यूप्रकरणी पाद्रीचे नाव समोर आले होते. या घटनेत त्याचे नाव समोर आल्यानंतर पोलिसांनी पाद्रीला अटक केली. पालकांच्या तक्रारीवरून पोलिसांनी याप्रकरणी पुजाऱ्याविरुद्ध गुन्हाही दाखल केला होता.

त्यादरम्यान पुजाऱ्याला 10,000 केनियन शिलिंग म्हणजेच भारतीय चलनात 6,000 रुपये दंड भरावा लागला. आता पुन्हा एकदा अत्यंत गंभीर प्रकरणात पास्टर पॉल मॅकेन्झी यांचे नाव समोर आले आहे. यावेळी अंधश्रद्धेपोटी मोठ्या संख्येने लोकांनी स्वर्गात स्थान मिळावे आणि येशूला भेटण्यासाठी पुजाऱ्याच्या सांगण्यावरून सामूहिक आत्महत्या केल्या आहेत.