Ganesh Chaturthi : बेचाळीस वर्षांचा इतिहास असलेल्या डिचोली सार्वजनिक गणेशोत्सव मंडळातर्फे यंदा पुण्यातील शनिवारवाड्याच्या प्रवेशद्वाराची हुबेहूब प्रतिकृती उभारण्यात आली आहे. हा भव्य देखावा यंदा गणेशभक्तांचे नक्कीच आकर्षण ठरणार असल्याचा विश्वास गणेशोत्सव मंडळाच्या पदाधिकाऱ्यांना आहे. हा देखावा 51 फूट रुंद आणि 18 फूट उंच आहे.

गणेशोत्सव मंडळ पदाधिकाऱ्यांच्या नगराध्यक्ष कुंदन फळारी यांच्या हस्ते रविवारी (ता.28) या देखाव्याचे अनावरण करण्यात आले. दरवर्षी वेगवेगळे आणि आकर्षक देखावे उभारण्यावर डिचोली गणेशोत्सव मंडळाचा भर असतो. यंदा शनिवारवाड्याची संकल्पना समोर ठेवून देखावा उभारण्यात आला आहे.

तब्बल पंधरा दिवस मेहनत घेऊन डिचोलीतील एक प्रसिद्ध चित्रकार मिलिंद तेली यांनी साथी कारगिरांच्या मदतीने हा देखावा साकारला आहे. गणेशोत्सव मंडळाच्या सदस्यांनीही याकामी हातभार लावला आहे. हा देखावा उभारण्यासाठी जवळपास २ लाख रुपये खर्च आला आहे.

पर्यावरणपूरक देखावा

प्लायवूड, लोखंड यापासून हा देखावा उभारण्यात आला असून, यंदाचा हा देखावा पूर्णपणे पर्यावरणपूरक आहे. अशी माहिती चित्रकार मिलिंद तेली यांनी देऊन हा देखावा गणेशभक्तांना निश्चितच आकर्षित करणार असल्याचा विश्वास व्यक्त केला.