Uttar Pradesh Crime: उत्तर प्रदेशातील गाझियाबादमधून एक धक्कादायक बातमी समोर आली आहे. इथे एका व्यक्तीने पत्नीने चहा देण्यास उशीर केल्यामुळे तलवारीने वार केले. गाझियाबादच्या मोदीनगर भोजपूर पोलीस ठाण्यात ही घटना घडली आहे. घटनेची माहिती मिळताच पोलिसांनी आरोपीला खुनाच्या आरोपाखाली अटक केली. याशिवाय, त्याच्याकडून खुनात वापरलेले शस्त्रही जप्त करण्यात आले आहे.

दरम्यान, पोलिसांच्या प्राथमिक तपासात आरोपीने मयत महिलेवर अनेकदा वार केल्याचे समोर आले आहे. पोलिसांनी दिलेल्या माहितीनुसार, पीडित महिलेवर अनेक वेळा वार झाल्यानंतर तिचा मृत्यू झाला. पोलिसांनी मृतदेह ताब्यात घेऊन पोस्टमॉर्टमसाठी पाठवला आहे. पोलिसांनी आरोपीची ओळख धरमवीर अशी केली आहे. सकाळी धर्मवीरने पत्नीकडे चहा मागितला असता तिने चहा तयार करण्यास थोडा वेळ लागेल असे सांगितले, असे पोलिस तपासात समोर आले आहे. यानंतर दोघांमध्ये बाचाबाची सुरु झाली.

यानंतर आरोपीने पत्नीवर हल्ला केला. दरम्यान महिलेची आरडाओरडा ऐकून गावकरी तिच्या घराकडे धावले. त्यांना पीडिता रक्ताच्या थारोळ्यात पडलेली आढळली. सहायक पोलिस आयुक्त (एसीपी) ज्ञान प्रकाश राय यांनी सांगितले की, धर्मवीर आणि त्याची पत्नी यांच्यात चहा बनवण्यावरुन भांडण झाले. त्यानंतर धर्मवीरने धारदार शस्त्र काढून तिच्यावर वार केल्याने जागीच मृत्यू झाला.