अरुणाचल प्रदेशच्या (Arunachal Pradesh) सीमावर्ती भागात चिनी सैन्याच्या (Chinese Army) पुन्हा एकदा हालचाली दिसून आल्या आहेत. चीनची पीपल्स लिबरेशन आर्मी (PLA) अरुणाचल प्रदेशच्या सीमेजवळ बांधकाम करत आहे. मोठमोठी मशीन आणून हे बांधकाम केले जात आहे. पोकलॅनचे काम सुरू असतानाचा याबाबत स्थानिक लोकांनी तयार केलेला एक व्हिडिओ समोर आला आहे.

इंडिया टुडेने याबाबत प्रसारित केलेल्या बातमीनुसार, एक व्हिडिओ समोर आला आहे ज्यात असा दावा केला आहे की, चिनी सैन्याच्या बांधकामात वापरल्या जाणार्‍या अवजड मशीन अरुणाचल प्रदेशच्या सीमेजवळ काम करताना दिसत आहेत. अरुणाचल प्रदेशातील अंजू जिल्ह्यातील लोकांच्या म्हणण्यानुसार, भारतीय सीमेजवळ असलेल्या चगलगामच्या हदिगरा-डेल्टा 6 भागात पीएलएचे जवान बांधकाम करत आहेत.

बांधकाम संबधित सुरू असलेला या कामाचा हा व्हिडिओ 11 ऑगस्ट 2022 रोजी रेकॉर्ड करण्यात आल्याची माहिती समोर आली आहे. या व्हिडिओमध्ये काही लोक डोंगराळ भागात मशिनद्वारे पर्वत तोडताना दिसत आहेत. अरुणाचल प्रदेशातील एलएसीजवळ राहणाऱ्या लोकांनी चीनच्या या कथित घुसखोरीवर गंभीर चिंता व्यक्त केली आहे. चगलम हे भारत-चीन सीमेजवळ (LAC) भारताचे शेवटचे प्रशासकीय चौकी आहे. चगलमबाबत सूत्रांनी सांगितले की, सामान्य माणसाला येथे पोहोचण्यासाठी सुमारे चार दिवस लागतात.

याबाबत माहिती देताना एका स्थानिक नागरिकाने सांगितले की, भारतीय लष्कर आंतरराष्ट्रीय सीमेजवळ कोणालाही परवानगी देत ​​नाही. मात्र, भारताच्या बाजूने उभारलेल्या पायाभूत सुविधा कमकुवत असल्याचेही त्यांनी नमूद केले. बॉर्डर रोड ऑर्गनायझेशन येथे अतिशय संथ गतीने काम करत असल्याचे स्थानिक लोकांचे म्हणणे आहे, तर चीनने सीमेपर्यंत पोहोचण्यासाठी 4 लेनचा रस्ता तयार करत आहे.