Uttar Pradesh Crime: उत्तर प्रदेशातील गाझियाबादमधून एक अत्यंत धक्कादायक घटना समोर आली, जिथे तीन सख्या अल्पवयीन बहिणींनी एकाच वेळी नवव्या मजल्यावरुन उडी मारुन आपली जीवनयात्रा संपवली. टीला मोड पोलीस ठाण्याच्या हद्दीतील 'भारत सिटी' सोसायटीमध्ये ही दुर्दैवी घटना घडली. या तिन्ही बहिणींना ऑनलाइन गेमिंगचे प्रचंड व्यसन जडले होते आणि याच व्यसनातून त्यांनी हे टोकाचे पाऊल उचलले.

16 वर्षीय निशिका, 14 वर्षीय प्राची आणि 12 वर्षीय पाखी अशी या मृत मुलींची नावे आहेत. या घटनेने केवळ गाझियाबादच नव्हे, तर संपूर्ण देश हादरुन गेला असून ऑनलाइन गेमिंगचे व्यसन मुलांच्या जीवावर कसे बेतू शकते, याचे हे भयाण वास्तव समोर आले आहे.

पोलिसांनी दिलेल्या माहितीनुसार, या तिन्ही बहिणींना 'कोरियन लव्हर' नावाच्या एका ऑनलाइन टास्क-बेस्ड गेमचे व्यसन लागले होते. कोरोना काळातील लॉकडाऊनमध्ये शाळा बंद असताना त्यांच्या हातात मोबाईल आला आणि तेव्हापासून त्यांना हे गेमिंगचे वेड लागले. तासनतास मोबाईलमध्ये मग्न राहणाऱ्या या मुलींना त्यांच्या वडिलांनी वारंवार टोकले होते आणि गेम न खेळण्यावरुन त्यांना ओरडलेही होते.

याच रागातून आणि गेमच्या प्रभावातून या मुलींनी रात्रीच्या सुमारास टोकाचा निर्णय घेतला. आत्महत्या करण्यापूर्वी त्यांनी आपल्या खोलीत आई-वडिलांसाठी एक सुसाईड नोट आणि डायरी सोडली होती. "सॉरी मम्मी-पापा, आम्ही गेम सोडू शकत नाही," असे त्यांनी चिठ्ठीत लिहिले होते. तसेच आपल्या डायरीमध्ये या व्यसनाबद्दल सविस्तर लिहून ठेवल्याचेही त्यांनी नमूद केले.

पहाटे दोनच्या सुमारास जेव्हा संपूर्ण सोसायटी गाढ झोपेत होती, तेव्हा या तिन्ही बहिणींनी नवव्या मजल्यावरुन एकत्र उडी घेतली. या घटनेची माहिती मिळताच पोलिसांनी घटनास्थळी धाव घेऊन तपास सुरु केला. सहायक पोलीस आयुक्त अतुल कुमार सिंह यांनी सांगितले की, प्राथमिक तपासात या मुलींना कोरियन गेम्सची चटक लागल्याचे आणि पालकांच्या विरोधामुळे त्या मानसिक तणावात असल्याचे समोर आले.

ही केवळ आत्महत्या नसून ऑनलाइन गेमिंग कंपन्या कशाप्रकारे लहान मुलांना आपल्या जाळ्यात ओढून त्यांना आत्महत्येस प्रवृत्त करतात, याचा पोलीस (Police) आता गांभीर्याने तपास करत आहेत. पालकांनी आपल्या मुलांच्या मोबाईल वापराकडे आणि त्यांच्या वागणुकीतील बदलांकडे लक्ष देणे किती गरजेचे आहे, हे या घटनेने पुन्हा एकदा अधोरेखित केले आहे.