तृणमूल काँग्रेस (टीएमसी) च्या सुप्रीमो आणि पश्चिम बंगालच्या मुख्यमंत्री ममता बॅनर्जी यांनी गुरुवारी विरोधकांना चांगले सुनावले. त्या म्हणाल्या, भाजप आणि सीपीआय-एमच्या नेत्यांना “अधिक बोलण्याची आणि कमी काम करण्याची” सवय आहे.

कोलकाता महानगरपालिकेच्या (KMC) नवनिर्वाचित नगरसेवकांना संबोधित करताना, ममता बॅनर्जी (Mamata Banerjee) यांनी 19 डिसेंबर रोजी शांततेत मतदान पार पाडल्याबद्दल राज्य निवडणूक आयोगाचे तसेच पोलिस विभागाचे कौतुक केले. बॅनर्जी म्हणाल्या की, "केएमसीचे रिपोर्ट कार्ड तयार केले जाईल आणि दर सहा महिन्यांनी त्याचे मूल्यांकन केले जाईल. जर एखाद्या नगरसेवकाने समाधानकारक काम केले नसेल तर राज्य सरकार त्याच्यावर कारवाई करेल. कोलकातामधील सर्व राजकीय होर्डिंग्ज काढून टाकले जातील व शहर स्वच्छ ठेवण्यासाठी पावलं उचलली जातील."

पश्चिम बंगालचे (West Bengal) परिवहन आणि गृहनिर्माण मंत्री फिरहाद हकीम यांची आणखी एका टर्मसाठी कोलकाताच्या (Kolkata) महापौरपदी नियुक्ती करण्यात आली आहे. बॅनर्जी यांच्या अध्यक्षतेखाली झालेल्या टीएमसीच्या बैठकीत हकीम यांची नियुक्ती निश्चित करण्यात आली. कोलकाता महानगरपालिकेच्या निवडणुकीत टीएमसीने (TMC) 144 पैकी 134 जागा जिंकून मोठा विजय मिळवला. भाजपला 3 वॉर्ड जिंकता आले, तर काँग्रेस आणि डाव्यांनी प्रत्येकी 2 जागा जिंकल्या. यापूर्वी पाच वॉर्ड ताब्यात असलेल्या भाजपचा दोन प्रभागांत पराभव झाला. टीएमसीला 92.36 टक्के मते मिळाली.