Indian Defence Ministry: भारताचे संरक्षण मंत्रालय ही जगात सर्वाधिक नोकऱ्या देणारा विभाग ठरला आहे. संरक्षण मंत्रालयाने 29 लाख 20 हजार लोकांना रोजगार दिला आहे. याबाबतीत भारताच्या संरक्षण मंत्रालयाने महासत्ता अमेरिका आणि जगात सर्वाधिक मोठे भुदल असलेल्या चीनलाही मागे टाकले आहे.

जर्मनीतील स्टॅटिस्टा इन्फोग्राफिक (Statista infographic) या संस्थेच्या अभ्यासातून ही माहिती समोर आली आहे. स्टॅटिस्टा या संस्थेच्या अहवालात म्हटले आहे की, 29 लाख 20 हजार जणांना रोजगार देणे, हा मोठा आकडा आहे. विशेष म्हणजे, एखाद्या विभागात किंवा संस्थेत कार्यरत कमर्चाऱ्यांची ही जगात सर्वाधिक संख्या आहे.

यात लष्कराच्या भूदल, नौदल आणि हवाईदल अशा तिन्ही दलातील सर्व विभागातील नोकऱ्यांचा समावेश आहे. एकंदरीत नोकरी देण्यात भारताचे संरक्षण मंत्रालय जगात अव्वल स्थानी आहे. या बाबतीत संरक्षण मंत्रालयाने अमेरिका आणि चीन या देशांनाही मागे टाकले आहे.

स्टॅटिस्टा ही एक खासगी संस्था आहे, जी जगभरातील विविध बाबतीतील आकडेवारी तयार करून प्रसिद्ध करत असते. स्टॅटिस्टा-2022 अहवालात म्हटले आहे की, अमेरिकेचा संरक्षण विभाग पेंटॅगॉनशी संबंधित सर्व विभागांनी 29 लाख 10 हजार नोकऱ्या दिल्या आहेत. तर सर्वाधिक नोकऱ्या देणाऱ्या संस्थांच्या या क्रमवारीत चीनच्या पीपल्स लिबरेशन आर्मीचा (पीएलए) तिसरा क्रमांक लागतो. 'पीएलए'ने 25 लाख नोकऱ्या दिल्या आहेत.

वॉलमार्टमध्ये 23 लाख तर अॅमेझॉनमध्ये 16 लाख कर्मचारी

अहवालात म्हटले आहे की, खासगी कंपन्यांचा विचार केला असता जगात वॉलमार्ट या कंपनीत सर्वाधिक 23 लाख कर्मचारी आहेत तर त्याखालोखाल अॅमेझॉनमध्ये 16 लाख कर्मचारी कार्यरत आहेत. या दोन्ही कंपन्या अमेरिकेच्या असून जगभरात त्यांचा पसारा आहे.

लष्करावर खर्च करण्यात भारत तिसऱ्या स्थानी

जागतिक स्तरावर सैन्यावरील खर्चात २०२१ मध्ये वाढ होऊन हा खर्च 2113 अब्ज डॉलरवर पोहचला आहे. स्टॉकहोम इंटरनेशनल पीस रिसर्च इंस्टीट्यूट (SIPRI) च्या अहवालानुसार जगात अमेरिका, भारत, चीन, ब्रिटन आणि रशिया लष्करावर मोठा खर्च करतात. अमेरिकेने 2021 मध्ये लष्करावर 801 अब्ज डॉलर खर्च केले, चीनने 293 अब्ज डॉलर तर भारताने 76.6 अब्ज डॉलर खर्च केले आहेत.