नवी दिल्ली : नैर्ऋत्य मोसमी वारे (मान्सून) (Mansoon) चा जुलै (July) महिन्याचा अंदाज समोर आला आहे. जुलै महिन्यात सरासरीच्या तुलनेत ९४ चे १०६ टक्के पावसाचा अंदाज भारतीय हवामान विभागाकडून (IMD) वर्तविण्यात आला आहे. महाराष्ट्रात अनेक भागात सरासरीपेक्षा कमी पावसाची शक्यता वर्तविण्यात आली आहे. असे भारतीय हवामान विभागाचे महासंचालक मृत्युंजय महापात्रा यांनी सांगितले आहे.

जुलै महिन्यात देशात ९४ ते १०६ टक्के इतक्या पावसाची शक्यता आहे. राज्यांसह दक्षिण भारत, पूर्व भारतात काही भागात पावसाचे प्रमाण सरासरी इतके राहणार आहे. मध्य भारतात सरासरीपेक्षा जास्त पावसाचा अंदाज वर्तविण्यात आला आहे. महाराष्ट्रात यंदा कोकण, मध्य महाराष्ट्र, मराठवाडा आणि विदर्भाच्या काही भागात सरासरीपेक्षा कमी किंवा सरासरी इतका पावसाचा अंदाज आहे. बंगालच्या उपसागरात आणि अरबी समुद्रात तापमानाचा फरक सध्या सर्वसामान्य आहे. मान्सून हंगामातही स्थिती नकारात्मक होण्याची शक्यता आहे. त्यामुळे येणाऱ्या काळात बहुतांश भागात पाणी टंचाई पहावयास मिळू शकते.

मॉन्सून राज्यात दाखल झाल्यनंतर कोकण आणि विदर्भ वगळता त्याने राज्यात दडी मारलेली आहे. राज्यात पावसाला जोर धरण्यास अजून काही दिवस तरी प्रतीक्षा करावी लागणार आहे. कोकणात काही ठिकाणी तर राज्यात अनेक ठिकाणी हलका ते मध्यम पाऊस अपेक्षित आहे.