आगामी टी-२० विश्वचषकासाठी भारतीय संघाची घोषणा होताच क्रिकेट वर्तुळात अनेक चर्चांना उधाण आले आहे. यामध्ये सर्वात धक्कादायक निर्णय म्हणजे सलामीवीर शुभमन गिलला संघात स्थान न मिळणे. गेल्या काही काळापासून भारतीय टी-२० संघाचा उपकर्णधार आणि महत्त्वाचा खेळाडू म्हणून ओळखल्या जाणाऱ्या गिलला बाहेरचा रस्ता दाखवण्यात आल्याने चाहत्यांना मोठा धक्का बसला आहे. या विषयावर आता स्वतः कर्णधार सूर्यकुमार यादव आणि निवड समितीचे अध्यक्ष अजित आगरकर यांनी स्पष्टीकरण दिले असून, गिलला डच्चू देण्यामागची 'इनसाइड स्टोरी' समोर आली आहे.

फॉर्म नव्हे तर 'कॉम्बिनेशन' ठरले महत्त्वाचे कारण

शुभमन गिलला बाहेर ठेवण्याचा निर्णय हा त्याच्या खराब फॉर्ममुळे घेतल्याची चर्चा होती, मात्र सूर्यकुमार यादवने हे दावे फेटाळून लावले आहेत. सूर्याने सांगितले की, संघाला पहिल्या सहा षटकांत (पॉवरप्ले) आक्रमक सुरुवात हवी आहे आणि त्याच वेळी टॉप ऑर्डरमध्ये एका यष्टीरक्षक फलंदाजाची गरज होती. इशान किशनला संघात स्थान मिळाल्याने गिलला संघात सामावून घेणे कठीण झाले. संघ संतुलनासाठी रिंकू सिंग आणि वॉशिंग्टन सुंदर यांसारख्या खेळाडूंची खालच्या फळीत गरज असल्याचेही सूर्याने स्पष्ट केले.

उपकर्णधारपद आणि अक्षराचे पुनरागमन

अजित आगरकर यांनी शुभमन गिलच्या क्षमतेवर पूर्ण विश्वास व्यक्त केला, मात्र स्पर्धेच्या नियमांनुसार आणि संघाच्या गरजांनुसार कोणाला तरी बाहेर जावेच लागते, असे त्यांनी नमूद केले. विशेष म्हणजे, गिल बाहेर गेल्यामुळे आता अक्षर पटेलकडे पुन्हा एकदा उपकर्णधारपदाची धुरा सोपवण्यात आली आहे. आगरकर म्हणाले की, "भारतीय क्रिकेटमध्ये पर्यायांची कमतरता नाही, मात्र आम्हाला अशा यष्टीरक्षकाची गरज होती जो वरच्या क्रमांकावर खेळू शकेल. त्यामुळे गिलच्या जागी इशानला प्राधान्य दिले गेले."

निवड समितीच्या मते, हा निर्णय तात्पुरता असून केवळ विश्वचषकाच्या रणनीतीचा भाग आहे. रिंकू सिंगला लोअर मिडल ऑर्डरमध्ये फिनिशर म्हणून स्थान देणे ही संघाची प्राथमिकता होती. गिल जरी सध्या संघात नसला तरी तो एक दर्जेदार खेळाडू आहे, यात कोणाचेही दुमत नाही. मात्र, आगामी विश्वचषकात भारताला पावरप्लेमध्ये वर्चस्व गाजवायचे असल्याने हा कठीण निर्णय घेतल्याचे व्यवस्थापनाने सांगितले आहे.