England vs West Indies

इंग्लंड विरूध्द वेस्ट इंडिज यांच्यातील दुसऱ्या टी-२० सामन्यात इंग्लंडने वेस्ट इंडिजचा ४ विकेट्सने पराभव केला. या सामन्यात असा एक पराक्रम घडला आहे, जो टी-20 क्रिकेटच्या इतिहासात पहिल्यांदाच घडला आहे. वेस्ट इंडिजने सामन्यात प्रथम फलंदाजी करताना २० षटकांत १६ विकेट्सच्या मोबदल्यात १९६ धावा केल्या होत्या. त्यानंतर इंग्लंडने १८.३ षटकांत ६ विकेट्सच्या मोबदल्यात १९९ धावा करून सामना जिंकला.

या सामन्यात एकूण ३७४ धावा झाल्या, परंतु विशेष बाब म्हणजे दोन्ही संघांतील एकाही खेळाडूने वैयक्तिकरित्या ५० किंवा त्याहून अधिक धावा केल्या नाहीत. टी-२० क्रिकेट इतिहासात प्रथमच असं घडलं असून, कोणत्याही फलंदाजानं अर्धशतक न करता सर्वाधिक धावा झालेला टी-२० सामना असा एक आगळावेगळा विक्रम या सामन्याच्या नावावर नोंदवला गेला आहे.

यापूर्वी, २०२४ मध्ये बेल्जियम आणि ग्वेर्नसे यांच्यातील सामन्यादरम्यान कोणत्याही वैयक्तिक खेळाडूनं ५०+ धावा न करता टी-२० आंतरराष्ट्रीय सामन्यात सर्वाधिक धावा रचल्या गेल्या होत्या. दोन्ही संघांनी एपत्रितपणे या सामन्यात एकूण ३७१ धावा केल्या होत्या.

वैयक्तिक ५०+ धावा न करता टी-२० सामन्यात सर्वाधिक धावा

• ३७४ धावा - इंग्लंड विरुद्ध वेस्ट इंडिज, २०२५*

• ३७१ धावा - बेल्जियम विरुद्ध ग्वेर्नसी, २०२४

• ३६५ धावा - न्यूझीलंड विरुद्ध इंग्लंड, २०१३

• ३५१ धावा - ऑस्ट्रेलिया विरुद्ध इंग्लंड, २०२४

• ३४९ - ऑस्ट्रेलिया विरुद्ध इंग्लंड, २००७

याशिवाय, दुसऱ्या टी-२० सामन्यात जोस बटलरने ३६ चेंडूत ४७ धावा केल्या. बटलरने ४७ धावा करून टी-२० आंतरराष्ट्रीय क्रिकेटमध्ये एक खास विक्रम केला आहे. टी-२० आंतरराष्ट्रीय क्रिकेटमध्ये सर्वाधिक धावा करणारा बटलर जगातील चौथा फलंदाज बनला आहे.

रोहित शर्मा पहिल्या क्रमांकावर आहे. रोहितने आतापर्यंत आंतरराष्ट्रीय टी-२० मध्ये ४,२३१ धावा केल्या आहेत. बाबर आझम दुसऱ्या क्रमांकावर आहे. बाबरने आंतरराष्ट्रीय टी-२० मध्ये एकूण ४,२२३ धावा केल्या आहेत.

टी-२० मध्ये कारकिर्दीतील सर्वाधिक धावा

• ४,२३१ – रोहित शर्मा (१५१ डाव)

• ४,२२३ – बाबर आझम (१२१ डाव)

• ४,१८८ – विराट कोहली (११७ डाव)

• ३,६६८ – जोस बटलर (१२५ डाव)

• ३,६५६ – पॉल स्टर्लिंग (१४७ डाव)