ADITYA-L1: भारताचे पहिले सौर यान ‘आदित्य-एल१’ने शास्त्रीय माहिती गोळा करण्यास सुरुवात केली आहे. ‘द सुप्रा थर्मल अँड एनर्जेटिक पार्टिकल स्पेक्ट्रोमीटर’ (एसटीइपीएस- स्टेप्स) या उपकरणाच्या संवेदकाने (सेन्सर) पृथ्वीपासून 50 हजार किलोमीटर पेक्षा जास्त अंतरावरून सुप्रा-थर्मल आणि ऊर्जाक्षम आयनचे मोजमाप घेण्यास सुरुवात केली आहे.

भारतीय अवकाश संशोधन संस्थेने (इस्रो) ही माहिती ‘एक्स’वरील पोस्टवर सोमवारी दिली आहे. पृथ्वीभोवती असलेल्या कणांच्या वर्तनाचे विश्लेषण करण्यास ही माहिती शास्त्रज्ञांना उपयोगी ठरणार आहे. ‘इस्रो’ने एक आलेख शेअर केला आहे. त्यात ऊर्जाक्षम कणांच्या वातावरणातील फरक नोंदविला आहे.

‘आदित्य सोलर विंड पार्टिकल एक्सपिरीमेंट’ या उपकरणातील ‘स्टेप्स’ हे एक साधन आहे. शास्त्रीय माहिती गोळा करण्यास त्याने सुरुवात केली आहे.

या साधनात सहा सेन्सर आहेत. 10 सप्टेंबर रोजी पृथ्वीपासून 50 हजार किलोमीटर पेक्षा जास्त अंतरावर सक्रिय करण्यात आले. पृथ्वीच्या उत्सर्जित किरणांच्या पट्ट्याबाहेर ‘स्टेप्स’ स्थापित केले आहे.

उपकरणाच्या आवश्यक तपासणीनंतर ते पृथ्वीपासून आणखी ५० हजार किमी दूर जाईपर्यंत माहिती गोळा करण्याचे कार्य सुरू राहणार आहे.