काँग्रेस अध्यक्षा सोनिया गांधी यांना रुग्णालयातून डिस्चार्ज देण्यात आला आहे. कोरोनाशी संबंधित समस्यांमुळे त्यांना दिल्लीतील सर गंगाराम रुग्णालयात दाखल करण्यात आले होते. 75 वर्षीय सोनिया गांधी यांना 2 जून रोजी कोरोनाची लागण झाल्याचे आढळून आले. COVID-19 नंतर त्यांना 12 जून रोजी सर गंगाराम रुग्णालयात दाखल करण्यात आले होते. (Sonia gandhi discharged from hospital faces questioning in alleged money laundering case)

दरम्यान, नॅशनल हेराल्डप्रकरणी 23 जून रोजी चौकशीसाठी हजर राहण्यासाठी अंमलबजावणी संचालनालयाने (ईडी) सोनिया गांधींना समन्स जारी केले आहेत.

दुसरीकडे, सोनिया गांधींना (Sonia Gandhi) यापूर्वी 8 जून रोजी हजर राहण्यास सांगण्यात आले होते, परंतु कोरोनाची लागण झाल्यामुळे त्यांना तपास यंत्रणेसमोर हजर राहण्यासाठी नवीन तारीख देण्याची मागणी कॉंग्रेसकडून करण्यात आली होती. तपास यंत्रणा आधीच काँग्रेस (Congress) नेते राहुल गांधी (Rahul Gandhi) यांची चौकशी करत असून ते आता सोमवारी ईडीसमोर हजर झाले आहेत.

नॅशनल हेराल्ड प्रकरण काय?

देशाचे पहिले पंतप्रधान पंडीत जवाहरलाल नेहरू (Jawaharlal Nehru) यांनी 20 नोव्हेंबर 1937 रोजी असोसिएटेड जर्नल लिमिटेड (AJL) ची स्थापना केली. विविध भाषांमध्ये वर्तमानपत्रे प्रकाशित करणे हा त्या मागिल उद्देश होता. त्यानंतर इंग्रजीमध्ये नॅशनल हेराल्ड, हिंदीमध्ये नवजीवन आणि उर्दूमध्ये कौमी आवाज ही वृत्तपत्रे एजेएल अंतर्गत प्रकाशित करण्यात आली.

एजेएलच्या निर्मितीमध्ये पंडीत जवाहरलाल नेहरू यांची भूमिका असली तरीही ते कधीही त्यांच्या मालकीचे नव्हते. कारण, 5000 स्वातंत्र्यसैनिक या कंपनीला पाठिंबा देत होते आणि ते त्याचे शेअर होल्डरही होते. 90 च्या दशकात ही वृत्तपत्रे तोट्यात जायला लागली 2008 पर्यंत एजेएलवर 90 कोटी रुपयांपेक्षा जास्त कर्ज होते. मग AJL ने निर्णय घेतला की यापुढे वर्तमानपत्र प्रकाशित करण्यात येणार नाही. वृत्तपत्रांचे प्रकाशन बंद केल्यानंतर AJL मालमत्ता व्यवसायात उतरली.