तेलंगणाच्या महाबुबाबाद (Mahabubabad, Telangana) जिल्ह्यातील आदिवासी शेतकरी भुक्या रेडिया नाईक यांनी परिचितांकडून कर्ज घेउन तसेच, भाजीपाला विक्रीतून मिळवलेल्या उत्पन्नातून बचत करुन 2 लाख रुपये जमा केले होते. त्यांना पोटाच्या शस्त्रक्रियेसाठी पैशांची आवश्यकता होती. हे पैसे सुरक्षित रहावे म्हणुन त्यांनी घरातल्या कपाटात ठेवले होते. मात्र काही काळानंतर या शेतकऱ्याने जेव्हा दवाखान्यात जाण्यापुर्वी कपाट उघडुन पाहीले तेव्हा शेतकऱ्याला मोठा धक्का बसला. (Rats chew up farmers 2 lakh rupees)

मोठ्या मेहनतीने या शेतकऱ्याने जमा केलेले हे पैसे उंदराने पुर्णपणे कुर्तडुन टाकले. या घटनेमुळे शेतकऱ्याला मोठा धक्का बसला आहे. ही घटना समोर आल्यानंतर तेलंगणाचे आदिवासी, महिला व बालकल्याण मंत्री सत्यवती राठोड यांनी शेतकऱ्याला त्याच्या वैद्यकीय उपचार खर्चात मदत करण्याचे आश्वासन दिले आहे.

मंत्री सत्यवती राठोड यांनी रविवारी, 18 जुलै रोजी आश्वासन दिले की, शेतकऱ्याला त्याचे पैसे मिळतील आणि योग्य ती वैद्यकीय सेवा मिळेल. यापूर्वी शनिवारी महाबूबाबाद जिल्ह्यातील वेन्नूर येथील इंदिरानगर भागातील आदिवासी शेतकरी भुक्या रेडिया नाईक यांनी साठवून ठेवलेले पैसे उंदीरांनी कुर्तडल्याचे वृत्त समोर आले आहे.

मंत्र्यांच्या सूचनेवरून स्थानिक तहसीलदारांनी घटनेची चौकशी केली आहे. तहसीलदारांच्या म्हणण्यानुसार, CMRF मार्फत वैद्यकीय उपचारासाठी आवश्यक असलेला सर्व पाठिंबा शेतकऱ्याला मिळेल, असे आश्वासन मंत्र्यांनी महसूल अधिकाऱ्यांनी दिले. मंत्री सत्यवती यांनीही या शेतकऱ्याशी संवाद साधुन आश्वासन दिले आहे आणि चिंता दुर करण्याचा प्रयत्न केला आहे. तहशीलदारांनी असेही सांगितले की, या नोटांवरचे सिरियल नंबर दिसत असतील तर त्या नोटा परत मिळू शकतील.