पंतप्रधान नरेंद्र मोदी (Narendra Modi) यांचे ट्विटर अकाऊंट शनिवारी मध्य रात्री हॅकर्सनी हॅक केले आणि बिटकॉइनशी संबंधित एक ट्विट केल्याने लोकांना आश्चर्याचा धक्का बसला आहे. मात्र, लवकरच हे ट्विट पीएम मोदी (@narendramodi) यांच्या अधिकृत ट्विटर अकाउंटवरून हटवण्यात आले आणि आता त्यांचे ट्विटर हँडल पूर्णपणे सुरक्षित करण्यात आले आहे. हॅकर्सनी ट्विट करून लिहिले की, भारताने बिटकॉइनला कायदेशीर मान्यता दिली आहे.

केंद्र सरकारने (Central Government) भारतात क्रिप्टोकरन्सीला कायदेशीर मान्यता दिलेली नाही. अशा स्थितीत हॅकर्सनी बिटकॉईनबाबत केलेल्या ट्विटमुळे ट्विटरवर खळबळ उडाली आहे. मात्र, पीएम मोदींचे (PM) ट्विटर हँडल सुरक्षित करण्यात आल्याची माहिती पीएमओने नंतर माध्यमांना दिली.

हॅकर्सनी पीएम मोदींच्या ट्विटर हँडलवरून दोन ट्विट केले. पहिले ट्विट शनिवारी रात्री 2:11 वाजता आले, ज्यात म्हटले होते, 'भारताने बिटकॉइनला (Bitcoin) अधिकृतपणे कायदेशीर मान्यता दिली आहे. सरकारने 500 BTC विकत घेतले आहेत आणि ते सामान्य लोकांमध्ये वितरित केले जात आहेत. भारत लवकर करा...भविष्य आज आले आहे!’ हे ट्विट पीएम मोदींच्या ट्विटर हँडलवर दोन मिनिटे राहिले आणि नंतर हटवले गेले होते.

दुसरे ट्विट केवळ 3 मिनिटांच्या अंतराने म्हणजेच 2.14 वाजता केले गेले, ज्यामध्ये आधीच्या ट्विट मध्ये जे शब्द होते तेच पुन्हा सांगण्यात आहे. मात्र काही मिनिटांत तेही हटवण्यात आले. मात्र, तोपर्यंत पीएम मोदींच्या ट्विटर अकाउंटवरून ट्विटरवर केलेल्या या ट्विटचे स्क्रीनशॉट व्हायरल झाले होते.

पंतप्रधानांचे अधिकृत ट्विटर अकाऊंट हॅक झाल्याची माहिती देताना पीएमओने सांगितले की, पीएम मोदींच्या ट्विटर अकाऊंटशी छेडछाड करण्यात आली होती, ती लगेच दुरुस्त करण्यात आली. याबाबत ट्विटरनेही माहिती दिली आहे. पीएमओने सांगितले की, यावेळी पीएम मोदींच्या अकाऊंटवरून केलेल्या ट्विटकडे दुर्लक्ष करा.

2020 मध्ये, पंतप्रधान मोदींच्या वैयक्तिक वेबसाइटचे अधिकृत ट्विटर खाते (@narendramodi_in) देखील हॅक झाले होते. त्यादरम्यान बिटकॉइनच्या माध्यमातून कोरोना रिलीफ फंडात देणगी दिल्याची चर्चा होती. मात्र, त्यादरम्यानही हॅकर्सचे ट्विट तात्काळ डिलीट करून खाते सुरक्षित करण्यात आले होते.