उत्तर प्रदेशसह पाच राज्यांमध्ये होणाऱ्या विधानसभा निवडणुकीसाठी सर्वच पक्षांचा प्रचार सुरू आहे. दरम्यान, पंतप्रधान नरेंद्र मोदी यांनी आज (मंगळवारी ) नमो अ‍ॅपद्वारे देशभरातील भारतीय जनता पक्षाच्या कार्यकर्त्यांशी संवाद साधला. यावेळी ते म्हणाले की, सध्या देश स्वातंत्र्याचा अमृत महोत्सव साजरा करत आहे. आम्ही 23 जानेवारीपासून प्रजासत्ताक दिन साजरा करण्यास सुरुवात केली आहे. (Narendra Modi Latest News)

मोदी पुढे म्हणाले, आज राष्ट्रीय मतदार दिन आहे. मी देशातील सर्व मतदारांचे (Voters) अभिनंदन करतो. या दिनानिमित्त मी सर्व नागरिकांना आगामी निवडणुकीत मतदान करण्याचे आवाहन करतो. प्रत्येक मत महत्वाचे आहे. देशातील जनतेने निवडणुकांच्या माध्यमातून सातत्याने सरकार स्थापन केली आहेत, ही देशातील प्रत्येक मतदारासाठी अभिमानाची बाब आहे.

या वेळेस मोदी यांनी निवडणूक आयोगवर (Election Commission) भाष्य केले. ते म्हणाले, भारत (India) अशा देशांपैकी एक आहे जिथे निवडणूक आयोग (EC) लोकांना नोटीस बजावू शकतो, अधिकाऱ्यांची बदली करू शकतो. आपल्या निवडणूक प्रक्रियेने विविध देशांसाठी एक मानदंड निश्चित केला आहे. तुम्ही सर्व नागरिकांना मतदानासाठी प्रोत्साहित करा, असे पंतप्रधान मोदींनी सर्व कार्यकर्त्यांना सांगितले.