मोठ्या संख्येने विषारी दारुमुळे होणाऱ्या मृत्यूवर बिहारचे मुख्यमंत्री नितीश कुमार यांनी ''जो पिणार तो मरणार'' अशी प्रतिक्रिया दिली आहे. तर दुसरीकडे सत्ताधारी राष्ट्रीय जनता दलाचे आमदार सुधाकर सिंह यांनी सरकार संरक्षित नरसंहार असं म्हटलेलं आहे.

बिहार विधानसभेच्या सध्या सुरु असलेल्या हिवाळी अधिवेशनात बुधवारी (14 डिसेंबर) दारुमुळे होणाऱ्या मृत्यूवर जोरदार चर्चा झाली. पण आज गुरूवारी ही चर्चा आधिक जोरदार झाली.

गुरूवारी झालेल्या या चर्चेत एका बाजुला मुख्यमंत्री नितीश कुमार (Nitish Kumar) 'जो पिणार तो मरणार' असं म्हणत असताना दुसरीकडे राजदचे आमदार सुधाकर सिंह याला सत्ता संरक्षित नरसंहार म्हणत आहेत. या चर्चेत राजद च्या भाई विरेंद्र यांंनी या प्रकरणात 'भाजपा'ला जबाबदार धरले तर जगदानंद सिंह यांचे पुत्र आणि आपल्या बंडखोर स्वभावामुळे मंत्रीपद गमावलेले सुधाकर सिंह यांनी सरकारवर टीका केली आहे.

यावेळी नितीश कुमार यांनीही विरोधकांवर जोरदार टिका केली. नितीश कुमार म्हणाले कि, बिहारने महात्मा गांधीच्या विचाराने आणि बिहारच्या महिलांच्या मताचा आदर करुन दारुबंदी केली होती. आपण सर्वांनी दारुविरोधात अभियान चालवायला हवे.

विरोधकांवर टिका करताना नितीश कुमार म्हणाले कि, विरोधकांनी आधी त्यांची सत्ता असलेल्या राज्यात दारुच्या संदर्भात काय अवस्था आहे हे पहावं. विरोधकांची सत्ता असलेल्या राज्यात दारुमुळे किती लोक दगावले ? याचा विचार करावा.

सारण इथं विषारी दारुमुळे झालेल्या मृत्यूला भाजप जबाबदार आहे, असा आरोप राजदच्या विरेंद्र सिंह यांनी केले असले तरी सत्ताधारी पक्षाचे आमदार असुनही सुधाकर सिंह यांनी मात्र सरकारला घरचा आहेर दिला आहे. यावर भाजपच्या आमदारांनी टाळ्या वाजवुन सुधाकर सिंह यांच्या भुमीकेचे स्वागत केले.