पंतप्रधान नरेंद्र मोदी यांनी कोरोनाच्या पार्श्वभूमीवर सर्व मुख्यमंत्र्यांची बैठक घेत देशातील कोरोना स्थितीचा आढावा घेत अनेक राज्याच्या मुख्यमंत्र्यांना इंधन दरवाढीवरुन ही सुनावलं होतं. याला मुख्यमंत्री उद्धव ठाकरे यांनी प्रतिउत्तर देत पंतप्रधान नरेंद्र मोदी यांनी महाराष्ट्राला देणे बाकी असलेल्या थकबाकीची ही आठवण करुन दिली होती. याच मुद्यावरुन ममता बॅनर्जी यांनी ही मोदींवर टीकास्त्र सोडले आहे.(Mamata Banerjee criticizes Modi about petrol-diesel tax )

पण पंतप्रधान मोदींच्या या विधानाचा पश्चिम बंगालच्या मुख्यमंत्री ममता बॅनर्जी यांनी खरपूस समाचार घेतला आहे. “पंतप्रधान मोदी याचं विधान एकांगी असून लोकांना संभ्रमात टाकणारं आहे. त्यांनी बैठकीत सांगितलेले तथ्य खोटे आहेत. गेल्या तीन वर्षांपासून आम्ही पेट्रोल आणि डिझेलवर सबसिडी देत आहोत. यासाठी आम्ही एकूण १५०० कोटी रुपये खर्च केले आहेत”, अशा शब्दांत त्यांनी मोदींवर टीकास्त्र सोडलं आहे.

ममता बॅनर्जी पुढे म्हणाल्या की, “पंतप्रधान मोदी राज्यातील पेट्रोल आणि डिझेलवरील कर कपात करण्याचं आवाहन करत आहेत. पण केंद्र सरकारकडे आमची ९७ हजार कोटींची थकबाकी आहे. केंद्राने यातील आर्धी रक्कम जरी दिली, तरी आम्ही कर कमी करू. नागरिकांच्या हिताचा विचार करून त्यांना त्वरित ३ हजार कोटींची सबसिडी देऊ. सबसिडी देण्यासाठी मला काहीही अडचण नाही. पण केंद्राकडे थकबाकी असल्याने राज्य सरकार कसं चालवायचं?” असा प्रश्नही त्यांनी यावेळी विचारला आहे.