Gorakhpur Railway Station: गोव्यात रोजगारासाठी घरातून बाहेर पडलेल्या युवकाचा मृतदेह गोरखपूर रेल्वे स्थानकावर आढळून आला. श्रावण निषाद असे या तरुणाचे नाव असून, तो दोन मित्रांसोबत कामानिमित्त गोव्यात येण्यासाठी निघाला होता. पण, गोव्याकडे निघण्यापूर्वी त्याचा गोरखपूर रेल्वे स्थानकावर आढळून आल्याने खळबळ निर्माण झाली.

मिळालेल्या माहितीनुसार, कप्तानगंज येथील श्रावण निषाद नावाचा तरुण याच गावातील रहिवासी कृष्णा आणि ​​कुलदीप यांच्यासह गोव्यात पेंटिंगच्या कामासाठी येत होते. श्रावण 28 नोव्हेंबर रोजी दुपारी साडेचार वाजता गोव्याला जायचे म्हणून घरातून बाहेर पडला.

दरम्यान, दुसऱ्या दिवशी श्रावणचे मित्र कृष्णा आणि कुलदीप रात्री एक वाजण्याच्या सुमारास लक्ष्मीपूर येथील त्यांच्या घरी आले. त्यांनी श्रावण बाबत विचारणा केली असता, घरातल्यांनी त्याच्याबाबत काही माहिती नसल्याचे सांगितले.

गुरुवारी मृत श्रावणचा भाऊ अजय याच्या मोबाईलवर रेल्वे पोलिसांकडून एक फोन आला. गोरखपूर रेल्वे स्टेशनच्या प्लॅटफॉर्म क्रमांक-९ जवळ एक मृतदेह सापडल्याचे त्यांनी सांगितले.

मृताच्या कुटुंबीयांनी घटनास्थळ गाठून मृतदेहाची ओळख पटवली. शवविच्छेदनानंतर मृतदेह घरी आणून कुटुंबीयांनी शुक्रवारी अंत्यसंस्कार केले. कुटुंबीयांनी याप्रकरणी पोलिसांत तक्रार दाखल करून कारवाईची मागणी केली आहे.