Kanpur Plane Crash Video: उत्तर प्रदेशातील कानपूर येथून एक अत्यंत दुर्दैवी आणि भीषण अपघाताची घटना समोर आली. कानपूरमधील गंगा बॅरेजजवळील नत्थूपुरवा गावाजवळ एक विमान कोसळले. या दुर्घटनेत विमानातील पायलट आणि सह-पायलट दोघांचाही जागीच मृत्यू झाला. या घटनेमुळे संपूर्ण परिसरात तीव्र हळहळ व्यक्त केली जात आहे.

मिळालेल्या माहितीनुसार, दुर्घटनाग्रस्त झालेले विमान हे एका खाजगी कंपनीचे होते आणि त्याचा वापर नवशिक्या पायलट्सच्या प्रशिक्षणासाठी केला जात होता. गुरुवारी दुपारी हे विमान नियमित उड्डाणावर असताना अचानक गंगा बॅरेजजवळील नत्थूपुरवा गावाच्या शेतांमध्ये कोसळले. विमान जमिनीवर कोसळताच मोठा आवाज झाला, ज्यामुळे परिसरात गोंधळाचे वातावरण निर्माण झाले. भीषण अपघाताचा (Accident) आवाज ऐकून स्थानिक ग्रामस्थ मोठ्या संख्येने घटनास्थळाकडे धावले.

दुसरीकडे, घटनेची माहिती मिळताच स्थानिक पोलीस प्रशासन, बचाव पथक आणि संबंधित अधिकाऱ्यांनी तात्काळ घटनास्थळी धाव घेतली. पोलीस आणि प्रशासनाच्या टीमने त्वरित मदत आणि बचावकार्य सुरु केले. परंतु, विमान जोरदार कोसळल्याने मोठे नुकसान झाले आणि त्यातील पायलट तसेच सह-पायलट या दोघांनाही वाचवणे शक्य झाले नाही. वैद्यकीय पथकाने दोघांच्याही मृत्यूची अधिकृत पुष्टी केली.

हे विमान नेमके कोणत्या तांत्रिक कारणामुळे किंवा हवामानातील बदलामुळे दुर्घटनाग्रस्त झाले, याची अद्याप कोणतीही स्पष्ट माहिती समोर आलेली नाही. सध्या पोलीस आणि नागरी विमान वाहतूक क्षेत्रातील तज्ज्ञ यंत्रणांनी दुर्घटनेच्या कारणांचा सखोल तपास सुरु केला आहे. अपघाताच्या ठिकाणावरुन विमानावरील महत्त्वाचे पुरावे आणि तांत्रिक अवशेष गोळा करण्याचे काम सुरु आहे. विमानाचा ब्लॅक बॉक्स आणि एअर ट्रॅफिक कंट्रोल (ATC) सोबत झालेला संपर्क यावरुन अपघातामागील मुख्य कारणाचा खुलासा होण्याची शक्यता वर्तवली जात आहे.