राष्ट्रीय काँग्रेस पक्षाला पुन्हा एकदा सामान्य नागरिकांसोबतचा संवाद वाढवण्याची गरज आहे. यासाठी काँग्रेसने चिंतन शिबिरात पक्षाच्या राष्ट्रीय अध्यक्षा सोनिया गांधी यांनी काँग्रेस भारत जोडो यात्रा सुरू करणार असल्याचे सांगितले. यातच पक्षातील महत्त्वाचे नेते राजीनामा देत पक्षाला रामराम ठोकताना दिसत आहेत. यामूळे काँग्रेसमधील अंतर्गत धूसफूस वाढली असताना राहुल गांधी मात्र ब्रिटन दौऱ्यावर जाणार असल्याने पक्षाचे कार्यकर्ते संभ्रमात पडले आहेत.

काँग्रेस नेते राहुल गांधी गुरुवारी लंडनला रवाना झाले आहेत. येथे ते 23 मे रोजी आयडियाज ऑफ इंडिया परिषदेला संबोधित करतील. त्यांचा येथील भारतीय समुदायाला भेटण्याचा कार्यक्रमही आहे. काँग्रेसचे मीडिया विभाग प्रमुख आणि पक्षाचे सरचिटणीस रणदीप सुरजेवाला यांनी ही माहिती दिली. त्यांनी सांगितले की, 23 मे रोजी केंब्रिज विद्यापीठात राहुल गांधी 'इंडिया अॅट 75' कार्यक्रमाला संबोधित करतील.

तसेच आयडियाज ऑफ इंडियाचे शुक्रवारी लंडनमध्ये लॉन्चिंग केले जाईल.राहुल गांधी गुरुवारी सायंकाळपर्यंत लंडनला पोहोचतील. या कार्यक्रमाला काँग्रेस नेते सलमान खुर्शीद आणि प्रियांक खरगेही उपस्थित राहणार आहेत. कोविड-19 महामारीच्या काळात प्रवासाबाबत परिस्थिती सामान्य झाल्यानंतर राहुल गांधी यांचा हा पहिलाच विदेश दौरा आखला असताना दुसरीकडे गुजरात आणि पंजाबमध्ये पक्षात फूट पडत असताना राहुल गांधी विदेश दौऱ्यावर गेल्याने काँग्रेस कार्यकर्ते संभ्रमात आहेत.