कोरोनाच्या संकटातून नागरिक बाहेर पडत असताना मंकीपॉक्सचे (monkeypox ) संकट समोर येऊन ठेपले आहे. भारतात जुलैच्या दुसऱ्या आठवड्यात केरळमध्ये मंकिपॉक्सचा पहिला रूग्ण आढळला आला. केरळमध्ये आजवर तीन रूग्ण आढळले आहेत. त्यापैरकी युएई (UAE) वरून परतलेल्या तरूणाचा शनिवारी मृत्यू झाल्याची माहिती समोर आली आहे. भारतातील मंकिपॉक्सचा हा पहिला बळी असून, आफ्रिेकेबाहेरचा चौथा बळी आहे. (India’s first monkeypox death reported in Kerala)

केरळमधील पुन्नियूर, त्रिशूर येथील रहिवाशी असेलला या 22 वर्षीय तरूणाला युएई मध्येच मंकीपॉक्सचा संसर्ग झाल्याची माहिती समोर आली आहे. शनिवारी त्याचा मृत्यू झाला आहे. देशातील हा पहिला मंकीपॉक्सचा बळी ठरला आहे. तरूणाच्या कुटुंबियांनी त्याला मंकीपॉक्सची लागण झाल्याची माहिती शनिवारी रूग्णालयाकडे जमा केली. परदेशातच त्याला संसर्ग झाल्याचे कागदपत्रावरून निष्पन्न झाले आहे. यामुळे आरोग्य यंत्रणा सतर्क झाली असून, प्रकरणी सखोल चौकशी करण्याचे आदेश आरोग्य विभागाने दिले आहेत.

तरूण 22 जुलै रोजी युएई वरून परतला त्यावेळी तो तंदुरूस्त होता. मित्रांसोबत तो खेळला देखील, 26 तारखेला त्याला ताप आल्याने स्थानिक रूग्णालयात त्यांने उपचार घेतले. पुढील उपचारासाठी त्याला दुसऱ्या रूग्णालयात हलविण्यात आले. तब्येत जास्त बिघडल्याने त्याला लाईफ सपोर्ट लावला होता. दरम्यान, शनिवारी दुपारी त्याचा मृत्यू झाला. शासकिय नियमांनुसार त्याचा अंत्यसंस्कार केले जाणार आहेत.

भारतात आत्तापर्यंत चार मंकिपॉक्सचे रूग्ण आढळले आहेत, त्यापैकी तीन केरळमधील आहेत. एकाचा शनिवारी मृत्यू झाला आहे. जगातील 80 देशात 22 हजार मंकिपॉक्सचे रूग्ण आढळून आले आहेत. आजवर 75 रूग्णांचा मृत्यू झाला आहे. सर्वाधिक मृत्यू आफिकेतील आहेत.