नॉटिंगहॅम : इंग्लंडमध्ये पुढील वर्षी (२०२६) महिलांच्या टी-२० विश्‍वकरंडकाचे आयोजन करण्यात येणार आहे. आता भारतीय महिला क्रिकेट संघासमोर इंग्लंडचे आव्हान असणार आहे. या दोन देशांमध्ये पाच सामन्यांच्या टी-२० मालिकेचा थरार रंगणार आहे. यापैकी पहिला सामना नॉटिंगहॅम येथे पार पडणार आहे.

टी-२० विश्‍वकरंडकाला अद्याप वर्षभराचा अवधी आहे, पण भारत व इंग्लंड या दोन्ही संघांना पाच सामन्यांच्या मालिकेपासून तयारी करता येणार आहे. शेफाली वर्मा हिचे भारतीय महिला संघात पुनरागमन झाले आहे.

तसेच क्रांती गौड, श्री चरणी व सायली सातघरे या नव्या चेहऱ्यांनाही संधी देण्यात आली आहे. शेफाली वर्मा व स्मृती मानधना यांच्या खांद्यावर सलामी फलंदाजीची जबाबदारी असणार आहे. उमा छेत्रीला आपला ठसा उमटवावा लागणार आहे.

स्नेह, अमनज्योतकडून आशा

स्नेह राणा व अमनज्योत कौर या दोन अष्टपैलू खेळाडूंचेही भारतीय महिला संघात पुनरागमन झाले आहे. त्यामुळे या दोन्ही खेळाडूंच्या कामगिरीकडे लक्ष असणार आहे. रेणूका सिंग व पूजा वस्त्रकार या वेगवान गोलंदाजांना दुखापत झाली आहे. त्यामुळे या मालिकेत दोनही खेळाडूंची अनुपस्थिती असणार आहे. भारतीय संघात संधी मिळालेल्या युवा खेळाडूंना इंग्लंडविरुद्धच्या मालिकेत चमक दाखवावी लागणार आहे.

भारतीय महिला संघाची फलंदाजीची मदार अनुभवी खेळाडूंवर असणार आहे. कर्णधार हरमनप्रीत कौर, स्मृती मानधना, शेफाली वर्मा, जेमिमा रॉड्रिग्ज, रिचा घोष या खेळाडूंना फलंदाजीत प्रतिस्पर्धी संघातील गोलंदाजांवर वर्चस्व दाखवावे लागणार आहे.

प्रतिस्पर्ध्याचे आव्हान

भारतीय संघासमोर इंग्लंडसारखा बलाढ्य प्रतिस्पर्धी आहे. इंग्लंडच्या संघात अनुभवी खेळाडूंचा भरणा आहे. ॲमी जोन्स, टॅमी ब्यूमोंट, डॅनी वॅट, सोफी एक्लेस्टोन या अनुभवी खेळाडूंमुळे इंग्लंड संघाचे पारडे जड आहे. इंग्लंडच्या संघात युवा खेळाडूंनाही संधी देण्यात आली आहे. इसी वोंग, एलिस कॅपसी व सोफिया डंकली या युवा खेळाडूंची कामगिरी कशी होते, याकडेही लक्ष असणार आहे.