तामिळनाडूतील कोयम्बतूर येथील 21 वर्षीय सैनिकेश रविचंद्रन आता रशियाविरुद्ध युद्धात शस्त्र उचलणार आहे. तो युक्रेनच्या सैन्यात सामील झाला आहे. सैनिकेशच्या आई-वडिलांनाही याबाबत माहिती दिली.

सैनिकेश रविचंद्रन 2018 मध्ये अभ्यासानिमित्त युक्रेनला गेला होता. तो खार्किव येथील नॅशनल एरोस्पेस विद्यापीठात (University) शिकत होता. त्याचा कोर्स जुलै 2022 मध्ये पूर्ण होणार होता, मात्र त्याआधीच रशियाने युक्रेनवर आक्रमण केले.

मीडिया रिपोर्ट्सनुसार, रशियाने (Russia) युक्रेनवर केलेल्या हल्ल्यानंतर सैनिकेशचा त्याच्या घराशी संपर्क पूर्णपणे तुटला. सैनिकेशशी संपर्क न झाल्याने त्याच्या पालकांनी युक्रेनमधील (Ukraine) भारतीय दूतावासाशी संपर्क साधला. दूतावासाच्या अधिकाऱ्यांना त्याची चौकशी केल्यावर माहिती समोर आली की त्याने रशिया विरुद्धच्या युद्धात सहभागी होण्याचा निर्णय घेतला आहे. तो युक्रेनच्या सैन्याचा भाग झाला आहे.

यादरम्यान सैनिकेशच्या आई-वडिलांनी सांगितले की, त्याला आधीच सैन्यात भरती व्हायचे होते. त्याने भारतीय सैन्यात भरती होण्यासाठी अर्जही केला होता, पण तो अर्ज फेटाळण्यात आला होता.