Rohit Sharma Record: ऑस्ट्रेलियाविरुद्ध सुरु असलेल्या वनडे मालिकेतील पहिल्या सामन्यात रोहित शर्मा मोठी खेळी खेळू शकला नाही, पण दुसऱ्या सामन्यात त्याने दमदार फलंदाजी करत फॉर्ममध्ये परतण्याचे संकेत दिले. आता या मालिकेतील तिसरा आणि शेवटचा सामना बाकी आहे. जर रोहितने आपला 'हिटमॅन' अवतार दाखवला, तर तो क्रिकेटमधील एक अत्यंत मोठा विश्वविक्रम आपल्या नावावर करु शकतो, जो सध्या पाकिस्तानचा माजी कर्णधार शाहिद आफ्रिदी (Shahid Afridi) याच्या नावावर आहे.
वनडे (ODI) आंतरराष्ट्रीय क्रिकेटमध्ये सर्वाधिक षटकार मारण्याचा विश्वविक्रम सध्या शाहिद आफ्रिदीच्या (Shahid Afridi) नावावर आहे. आफ्रिदीने आपल्या कारकिर्दीत 398 वनडे सामने खेळून 351 षटकार मारले आहेत. वनडे क्रिकेटमध्ये 350 हून अधिक षटकार मारणारा तो जगातील एकमेव खेळाडू आहे. आफ्रिदीने 2015 मध्ये वनडे क्रिकेटमधून निवृत्ती घेतली, म्हणजेच हा विक्रम सुमारे 10 वर्षे अबाधित आहे. आता रोहित शर्मासमोर (Rohit Sharma) हा विक्रम मोडण्याचे लक्ष्य असेल.
रोहित सध्या वनडे क्रिकेटमध्ये सर्वाधिक षटकार मारणाऱ्या फलंदाजांच्या यादीत दुसऱ्या क्रमांकावर आहे. रोहित शर्माने आतापर्यंत 275 वनडे सामन्यांमध्ये 346 षटकार लगावले आहेत. याचा अर्थ, त्याला आफ्रिदीला मागे टाकून पहिल्या क्रमांकावर पोहोचण्यासाठी केवळ 6 षटकारांची आवश्यकता आहे. 6 षटकार मारताच रोहित शर्मा नवा विश्वविक्रम करेल. तो जर आणखी 4 षटकार मारले, तर 350 षटकार पूर्ण करणारा तो जगातील दुसरा फलंदाज बनेल, आणि 5 षटकार मारल्यास तो आफ्रिदीच्या विक्रमाची बरोबरी करेल.
ऑस्ट्रेलियाविरुद्धच्या दुसऱ्या वनडे सामन्यात रोहित शर्माने धमाकेदार फलंदाजी केली. त्याने 97 चेंडूंमध्ये 7 चौकार आणि 2 उत्तुंग षटकारांच्या मदतीने 73 धावांची शानदार खेळी खेळली. मोठी धावसंख्या करण्याच्या प्रयत्नात तो बाद झाला, पण या खेळीमुळे तो आफ्रिदीच्या विक्रमाच्या आणखी जवळ पोहोचला. या मालिकेतील तिसरा आणि शेवटचा सामना बाकी आहे. रोहित शर्मा फॉर्ममध्ये परतलेला असताना जर त्याने या सामन्यात मोठी आणि तुफानी खेळी केली, तर शाहिद आफ्रिदीचा सुमारे 10 वर्षांपूर्वीचा हा विश्वविक्रम मोडला जाणे जवळपास निश्चित आहे.
दैनिक गोमंतकचे सदस्य व्हा
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.