Gujarat Crime: सुरतमधून एक धक्कादायक घटना समोर आली आहे. पीटीआय या वृत्तसंस्थेने दिलेल्या वृत्तानुसार, शनिवारी सुरतच्या उमरा भागातील फॅमिली कोर्टाच्या संकुलाबाहेर एका 73 वर्षीय व्यक्तीने आपल्या पत्नीवर चाकू हल्ला केला.

एका पोलीस अधिकाऱ्याने सांगितले की, ही महिला तिच्या पतीकडून 7,000 रुपयांच्या पोटगीची मागणी करत होती. घटनास्थळी उपस्थित असलेल्या पोलिसांनी आरोपी विनोद भानुशाली याला ताब्यात घेतले आहे. तर शारदाबेन (68) यांना रुग्णालयात दाखल करण्यात आले आहे.

दरम्यान, उमरा पोलिस (Police) ठाण्याचे निरीक्षक ए.एच. राजपूत यांनी सांगितले की, पीडिता मासिक सुनावणी ऐकून तिच्या मुलीसोबत दुचाकीवरुन जाण्याच्या तयारीत असताना ही घटना घडली.

पोलीस अधिकाऱ्यांनी सांगितले की, शारदाबेन गेल्या सहा वर्षांपासून पतीपासून विभक्त राहत होत्या. त्यांनी आरोपी विनोद भानुशालीकडून मासिक भत्त्याची मागणी करत सीआरपीसीच्या कलम 125 अंतर्गत गुन्हा दाखल केला आहे.

त्यावर, शनिवारी कोर्टात सुनावणी झाली. न्यायालयाने भानुशाली यांना शारदाबेन यांना मासिक पोटगी म्हणून सात हजार रुपये देण्याचे निर्देश दिले. तसेच या प्रकरणाची सुनावणी 13 जूनपर्यंत पुढे ढकलण्यात आली आहे.

पोलिस अधिकाऱ्याने सांगितले की, आरोपी विनोद भानुशालीने आपल्या मुलीसह पीडिता कोर्टाच्या (Court) बाहेर जाण्याच्या तयारीत हा हल्ला केला. घटनास्थळी उपस्थित असलेल्या पोलिसांनी आरोपीला तात्काळ ताब्यात घेतले.