Goa-Raipur Flight: इंडिगो एअर लाइन्सची उड्डाणे गेल्या काही काळापासून उशीरा आणि रद्द होत आहेत. त्याचा मनस्ताप प्रवाशांना सहन करावा लागत आहे. शुक्रवारी इंडिगोच्या गोवा-रायपूर विमानाच्या उड्डाणाला नियोजित वेळेपेक्षा तब्बल चार तास उशीर झाला. त्याचा फटका प्रवाशांना बसला.

विमानतळावरून मिळालेल्या माहितीनुसार, गोव्याहून इंडिगो एअरलाइन्सची फ्लाइट (6E-712) इंदूरला 4.25 वाजता पोहोचते आणि 5 वाजता रायपूरला पोहोचते. मात्र ही फ्लाईट नियोजित वेळेपेक्षा चार तास उशिरा इंदूरला पोहचली. ती फ्लाईट 8.30 वाजता पोहोचली, तर रात्री 9 वाजता रायपूरकडे प्रयाण केले.

विमान कंपनीने विमानतळ व्यवस्थापनाला ऑपरेशनल कारणांमुळे उड्डाणाला उशीर झाल्याचे सांगितले आहे. तर सूत्रांवर विश्वास ठेवायचा झाल्यास, शुक्रवारी गोव्यात विमानात तांत्रिक बिघाड झाल्यामुळे उड्डाणाला उशीर झाल्याचे समजते.

विमानाला उशीर झाल्यामुळे इंदूरहून रायपूरला जाणाऱ्या प्रवाशांना विमानतळावरच थांबून राहावे लागले.

त्यामुळे त्यांना नाहक मनस्ताप झाला. प्रवाशांच्या नियोजित कामावर त्याचा परिणाम झाला. काही प्रवाशांनी एअरलाइन्सच्या कर्मचार्‍यांना यावरून जाब विचारला. यावेळी जोरदार वादावादी देखील झाली. काही काळ प्रवाशांचा हा गोंधळ सुरू होता.

एअरलाइन्सचे अधिकारी आणि विमानतळ व्यवस्थापनाने प्रवाशांना कसेबसे शांत केले. त्याचप्रमाणे इंडिगोचे अहमदाबादहून इंदूरला दुपारी 12.40 वाजता जाणारे आणि दुपारी 1 वाजता अहमदाबादला परतणारे विमानही काल अडीच तास उशिराने धावले.