येत्या काही दिवसात गुजरातमध्ये विधानसभा निवडणुका होणार आहेत. त्यामुळे अनेक राजकीय पक्ष निवडणुकीच्या मैदानात उतरले आहेत. अनेक राजकीय पक्षांनी आपापल्या पद्धतीने प्रचाराला सुरुवात केली आहे. याच पार्श्वभूमीवर आम आदमी पार्टीने ही प्रचार सुरु केला असून भाजपाचा अहंकार तोडण्यासाठी एक संधी द्या असे ही अरविंद केजरीवाल यांनी म्हटलं आहे. गुजरातमधील भरूच येथे आयोजित कार्यक्रमादरम्यान ते बोलत होते. (Give Aam Aadmi Party a chance in Gujarat )

यावेळी त्यांनी विमानप्रवासात घडलेली एक घटना सांगितली आहे. त्यांनी आपल्या भाषणात म्हटलं की, ”विमानातून प्रवास करताना, एक भाजपाचा नेता मला भेटला होता. त्याच्याशी गप्पा सुरू असताना मी त्याला विचारलं की, गुजरातमध्ये तुमची सत्ता असूनही तुम्ही काम का करत नाहीत? यावर तो म्हणाला की, आम्हाला काम करण्याची गरज काय ? येथील लोकं आम्हाला मतदान करत आहेत.

संपूर्ण काँग्रेस पक्ष आणि त्यांचे नेते आमच्या खिशात आहेत. ते कोणत्याही पक्षाकडून निवडणूक लढले तरी आम्हाला जेव्हा वाटेल तेव्हा ते आमच्याकडे येऊ शकतात.” हा प्रसंग सांगून केजरीवालांनी गुजरातच्या साडेसहा कोटी जनतेला आवाहन केलं की, “भाजपाचा हा अहंकार तोडण्यासाठी आम आदमी पार्टीला एक संधी द्या.

जर आम्ही काम करत नाही, असं तुम्हाला वाटलं तर पुढच्या वेळी आम्हाला मतं देऊ नका. पण एक संधी द्या” अशा शब्दांत अरविंद केजरीवाल यांनी भाजपावर निशाणा साधला आहे. असे म्हणत त्यांनी पुन्हा भ्रष्टाचारमुक्त शासन स्थापनेसाठी आम्हांला फक्त एकदा संधी देण्याचे ही आवाहन त्यांनी यावेळी केले.