कर्नाटकमध्ये वेगवान बीएमडब्ल्यू कारने दुभाजक तोडून स्कूटरवरून जाणाऱ्या एका महिलेला धडक दिल्याचे सीसीटीव्ही फुटेज समोर आले आहे. या अपघातात महिला गंभीर जखमी झाली आहे. या वेगवान कारने धडक दिल्याने दुभाजकावर उभी असलेली दुसरी महिला बचावल्याचे व्हिडिओत (Video) दिसत आहे.

दरम्यान, गोव्यात फेब्रुवारी महिन्यात झालेल्या एकूण 251 रस्ते अपघातात (Accident) 21 जणांना आपला जीव गमावावा लागल्याची माहिती आता समोर आली आहे. यात उत्तर गोव्यातील 7 तर दक्षिण गोव्यातील 14 जणांना अपघातात आपला नाहक बळी द्यावा लागला आहे. वाहतूक खात्याकडून फेब्रुवारी महिन्यात राज्यात झालेल्या अपघातांची आकडेवारी जाहीर करण्यात आली आहे.

फेब्रुवारी महिन्यात वाहतुकीच्या नियमांचं उल्लंघन केल्याप्रकरणी तब्बल 1740 चलन जारी करण्यात आले. उपलब्ध आकडेवारीनुसार 251 रस्ते अपघातांची नोंद करण्यात आली, ज्यात 21 मृत्यू झाले आहेत. 14 गंभीर अपघात ज्यात 7 उत्तर गोवा (North Goa) आणि 7 दक्षिण गोव्यात पाहायला मिळाले. तर 41 किरकोळ अपघात ज्यातील 18 उत्तर गोवा आणि 23 दक्षिण गोव्यात पाहायला मिळाले आहे. 175 असेही अपघात नोंदवण्यात आले ज्यात काही दुखापत झाली नाही, ज्यापैकी 97 उत्तर तर 78 दक्षिण गोव्यात झाले आहेत.