ED Action Against Benami Property: बेनामी संपत्तीप्रकरणी ईडीने युनिटेक ग्रुपवर मोठी कारवाई केली आहे. ED ने नोएडा सेक्टर-38A मध्ये बांधलेल्या गार्डन गॅलेरिया मॉलचा 40 टक्के भाग ताब्यात घेतला आहे. या जप्त केलेल्या जागेचे क्षेत्रफळ 1 लाख 40 हजार चौरस मीटर आहे. त्याचबरोबर या जमिनीची बाजार किंमत 65 कोटी 32 लाख रुपये असल्याचे सांगितले जात आहे. या प्रकरणात ईडीने आतापर्यंत युनिटेक समूहाची 1132.55 कोटींची मालमत्ता जप्त केली आहे.

विदेशी कंपनीत बेनामी मालमत्ता गुंतवली

सूत्रांनी दिलेल्या माहितीनुसार, युनिटेक ग्रुपने 2007-08 मध्ये विदेशी कंपनीत बेनामी मालमत्ता गुंतवली होती. त्या वर्षी समूहाने (Unitech Group) विदेशी कंपनीत $8 दशलक्ष गुंतवणूक (Investment) केली. यासोबतच नोएडातील सर्वात महागड्या भागात गार्डन गॅलेरिया मॉलही सुरु करण्यात आला आहे. ईडीच्या (ED) तपासात आतापर्यंत 6500 कोटींच्या व्यवहारांचे पुरावे मिळाले आहेत. तर एजन्सीचे अधिकारी उर्वरित पुरावे मिळवण्यात गुंतले आहेत.

युनिटेकच्या प्रवर्तकांना अटक करण्यात आली

बेनामी मालमत्तेच्या या प्रकरणात युनिटेकचे प्रवर्तक संजय चंद्रा, अजय चंद्रा, रमेश चंद्रा, प्रीती चंद्रा आणि राजेश मलिक यांना अटक करण्यात आली असून ते सध्या तुरुंगात आहेत. दिल्लीच्या तिहार तुरुंगात लक्झरी सुविधांचा पुरावा मिळाल्यानंतर सुप्रीम कोर्टाने युनिटेकच्या प्रवर्तकांना मुंबई तुरुंगात हलवले. तेव्हापासून सर्व आरोपी तिथेच बंद असून तुरुंगवास भोगत आहेत.