एअर इंडियाच्या विमानात एक लाजिरवाणी घटना समोर आली आहे. एका मद्यधुंद व्यक्तीने महिला प्रवाशावर लघुशंका केली आहे. ही महिला एअर इंडियाच्या बिझनेस क्लासमधून प्रवास करत होती.

त्यानंतर पीडित महिलेसोबत बसलेल्या एका व्यक्तीने तिच्या अंगावर लघुशंका केली. आरोपी दारूच्या नशेत असल्याचे सांगण्यात येत आहे. एअर इंडियाच्या (Air India) बिझनेस क्लासमध्ये एका महिलेच्या (Women) अंगावर लघुशंका केल्याची घटना 26 नोव्हेंबरची आहे. ही पीडित महिला न्यूयॉर्कहून दिल्लीला जात होती. आरोपीवर कोणतीही कारवाई झाली नसल्याचा आरोप आहे.

दरम्यान, हा प्रकार समोर आल्यानंतर एअर इंडियाकडून स्पष्टीकरण देण्यात आले आहे. एअर इंडियाच्या अधिकाऱ्यांनी सांगितलं की, या प्रकरणी पोलिसांत तक्रार दाखल करण्यात आली आहे. तसेच या घटनेनंतर अंतर्गत समिती स्थापन करण्यात आली असून आरोपी पुरुष प्रवाशाला 'नो-फ्लाय लिस्ट'मध्ये टाकण्याची शिफारस करण्यात आली आहे. हे प्रकरण आता सरकारी समितीच्या अखत्यारीत असून निर्णयाची प्रतीक्षा असल्याचे अधिकाऱ्यांनी सांगितले आहे.