Odisha: ओडिशातील बालासोर येथे बस चालवताना हृदयविकाराच्या झटक्याने एका व्यक्तीचा मृत्यू झाला. त्या व्यक्तीनेच योग्य वेळी बस थांबवून सुमारे 60 हून अधिक प्रवाशांचे प्राण वाचवले. बालासोर जिल्ह्यातील पातापूर चक येथे मंगळवारी ही घटना घडली.

बस चालवताना हृदयविकाराचा झटका

पोलिसांनी दिलेल्या माहितीनुसार, मंगळवारी बालासोरमध्ये बस चालवताना हृदयविकाराच्या झटक्याने एका व्यक्तीचा मृत्यू झाला, मात्र त्याने वेळीच बस थांबवून 60 हून अधिक प्रवाशांचे प्राण वाचवले. पोलिसांनी सांगितले की, मंगळवारी पहाटे ओडिशातील बालासोर जिल्ह्यातील पातापूर चक येथे ही घटना घडली.

बस पंचलिंगेश्वर मंदिराकडे जात होती

पश्चिम बंगालमधून पर्यटकांना घेऊन जाणारी बस जिल्ह्यातील पंचलिंगेश्वर मंदिराकडे जात असताना चालकाला अचानक छातीत तीव्र वेदना जाणवू लागल्या. वेदना जाणवू लागल्याने चालकाने बस रस्त्याच्या कडेला थांबवली आणि तो बेशुद्ध झाला. त्यानंतर घाबरलेल्या प्रवाशांनी स्थानिक लोकांना बोलावून घेत शेख अख्तर नावाच्या चालकाला जवळच्या निलगिरी उपविभागीय रुग्णालयात नेले.

पोलिसांनी पुढे सांगितले की, रुग्णालयातील डॉक्टरांनी चालकाला मृत घोषित केले. अमित दास या प्रवाशाने सांगितले की, ड्रायव्हर वाटेत अचानक आजारी पडला आणि त्याने बस थांबवली. गाडी रस्त्याच्या एका बाजूला थांबताच तो बेशुद्ध झाला. स्थानिक लोकांनी त्याला रुग्णालयात नेले असता डॉक्टरांनी त्याला मृत घोषित केले. यावेळी प्रवाशांनी आणि लोकांनी बसचालकाचे भरभरुन कौतुक केले.