Delhi Crime: देशाची राजधानी (दिल्ली) ॲसिड हल्ल्याच्या घटनेने हादरली. इथे एका अल्पवयीन मुलाने अल्पवयीन मुलीवर ॲसिड हल्ला केला. याबाबत पोलिसांनी माहिती दिली आहे. पोलिसांनी दिलेल्या माहितीनुसार, ही घटना दिल्लीतील बुराडी भागात घडली. पोलिसांनी सांगितले की, मुलीवर ॲसिड फेकल्यानंतर त्या मुलाला स्थानिक लोकांनी पकडले आणि नंतर त्याला पोलिसांच्या ताब्यात दिले. पोलिसांनी पुढे सांगितले की, ॲसिड हल्ल्याची माहिती मिळताच पोलिसांचे पथक तात्काळ घटनास्थळी पोहोचले आणि आरोपीला अटक करण्यात आली.

पोलिसांनी दिलेल्या माहितीनुसार, आरोपी मुलाचा पीडित मुलीसोबत वाद होता. त्यामुळे तो खूप तणावाखाली होता. मुलीशी वाद झाल्यानंतर रागाच्या भरात त्याने पीडितेवर ॲसिड फेकले. याप्रकरणी पोलिसांनी भारतीय दंड संहितेच्या कलम 326 बी आणि 341 नुसार गुन्हा दाखल केला आहे. वृत्तसंस्था एएनआयने दिलेल्या माहितीनुसार, ही घटना शुक्रवारी घडली. ॲसिड हल्ल्याने दिल्ली पुन्हा एकदा हादरली.

या घटनेबाबत, काही मीडिया रिपोर्ट्समध्ये असे म्हटले जात आहे की, बुराडी भागातील परशुराम एन्क्लेव्हमध्ये 11वीत शिकत असलेली विद्यार्थिनी तिच्या भावासोबत मोटरसायकलवरुन जात होती. त्याचवेळी, दुचाकीवरुन आलेल्या या अल्पवयीन मुलाने तिच्यावर (पीडित मुलगी) ॲसिड फेकले. त्यानंतर मुलीला तात्काळ बुराडी येथील रुग्णालयात नेण्यात आले. मीडिया रिपोर्ट्समध्ये असे म्हटले जात आहे की, या अल्पवयीन मुलाला महिला आणि मुलींप्रती द्वेष होता.

दरम्यान, रागाच्या भरात त्याने या मुलीला लक्ष्य केले. तो या मुलीला आधी ओळखत नव्हता असेही बोलले जात आहे. आरोपी मुलाला पकडण्यासाठी पोलिसांनी सीसीटीव्ही फुटेज तपासले, त्यानंतर मिळालेल्या पुराव्याच्या आधारे ते आरोपीपर्यंत पोहोचले. या अल्पवयीन विद्यार्थीनीवर मुलाने जे ॲसिड फेकले ते प्रयोगशाळेत चाचणीसाठी पाठवण्यात आल्याचेही सांगण्यात येत आहे. अल्पवयीन मुलाला सध्या बालसुधारगृहात पाठवण्यात आल्याचे सांगण्यात येत आहे. याप्रकरणी पोलीस अद्याप अधिक तपास करत आहेत.