Delhi Liquor Scam Case: दिल्ली मद्य घोटाळ्याप्रकरणी मुख्यमंत्री अरविंद केजरीवाल यांच्या अडचणीत वाढ झाली आहे. न्यायालयाने त्यांच्या न्यायालयीन कोठडीत 7 मे पर्यंत वाढ केली आहे. आता पुढील हजेरी 7 मे रोजी होणार आहे. त्यांच्यासोबतच के कविता यांच्या न्यायालयीन कोठडीतही न्यायालयाने वाढ केली आहे. अरविंद केजरीवाल यांची न्यायालयीन कोठडी संपल्यानंतर आज म्हणजेच 23 एप्रिल रोजी तुरुंगातून व्हीसीमार्फत न्यायालयात हजर झाले होते. आप नेते आणि दिल्लीचे उपमुख्यमंत्री मनीष सिसोदिया हे देखील मद्य घोटाळ्याप्रकरणी तुरुंगात आहेत.

दरम्यान, दिल्लीचे मुख्यमंत्री आणि आम आदमी पक्षाचे राष्ट्रीय संयोजक अरविंद केजरीवाल यांच्या प्रकृतीबाबतही राजकारण शिगेला पोहोचले आहे. एकीकडे आम आदमी पक्षाने तिहार जेल प्रशासनावर आरोप केला की, केजरीवाल यांना शुगर आहे पण तरीही त्यांना इन्सुलिन दिले जात नाहीये. या गदारोळानंतर पहिल्यांदाच केजरीवाल यांना इन्सुलिन देण्यात आले. दुसरीकडे, तुरुंग प्रशासनाने आम आदमी पक्षाचे सर्व आरोप पूर्णपणे फेटाळून लावले असून अरविंद केजरीवाल पूर्णपणे ठीक असल्याचे म्हटले आहे.

यापूर्वी, अरविंद केजरीवाल यांच्या न्यायालयीन कोठडीत 23 एप्रिलपर्यंत वाढ करण्यात आली होती. मुख्यमंत्र्यांची न्यायालयीन कोठडी संपल्यानंतर त्यांना न्यायमूर्ती कावेरी बावेजा यांच्या न्यायालयात हजर करण्यात आले. न्यायमूर्तींनी आता केजरीवाल यांच्या न्यायालयीन कोठडीत वाढ करण्याचे आदेश दिले आहेत. मुख्यमंत्री अरविंद केजरीवाल यांनी त्यांच्या अटकेला आणि रिमांडला सर्वोच्च न्यायालयात आव्हान दिले आहे. या प्रकरणावर 29 एप्रिल रोजी सुनावणी होणार आहे.