Surat, Gujrat: गुजरातमधील सुरत रेल्वे स्थानकावर चेंगराचेंगरी झाल्याची घटना समोर आली आहे. दिवाळी निमित्त घरी जाण्यासाठी रेल्वे स्थानकावर प्रवाशांची मोठी गर्दी झाली होती.

लोक ट्रेनने आपापल्या घरी जाण्यासाठी स्टेशनवर वाट पाहत होते याच दरम्यान बिहारला जाणारी ट्रेन स्टेशनवर आली आणि त्यात चढताना प्रवाशांमध्ये चेंगराचेंगरी झाली. यावेळी तीन ते चार जण बेशुद्ध झाले.

सुरत रेल्वे स्थानकावरच रुग्णवाहिकेद्वारे जखमींवर प्राथमिक उपचार करण्यात आले तर, एका जखमीचा उपचारादरम्यान मृत्यू झाला. सुरतचे खासदार आणि केंद्रीय रेल्वे राज्यमंत्री दर्शना जरदोश यांनी जखमींची भेट घेऊन विचारपूस केली.

सकाळी सुरत रेल्वे स्थानकावरून ताप्ती गंगा एक्सप्रेस ट्रेनमध्ये चढण्यासाठी प्रवाशांनी गर्दी केली, त्यामुळे एकच गोंधळ झाला आणि काही लोक बेशुद्ध झाले, असे पोलिस अधीक्षक (पश्चिम रेल्वे) सरजो कुमारी यांनी एका हिंदी वृत्तवाहिनीला सांगितले.

'गर्दीत एक व्यक्ती कोसळला दरम्यान त्याचा मृत्यू झाल्याचे समोर आले आहे. शवविच्छेदनानंतर मृत्यूचे नेमके कारण समजेल. अन्य दोन प्रवाशांना श्वास घेण्यास त्रास होत असून त्यांच्यावर उपचार सुरू आहेत. सुरतमधील हिरे आणि कापड उद्योगातील अनेक कामगार छठपूजेसाठी दरवर्षी बिहार आणि उत्तर प्रदेशमधील त्यांच्या गावी जातात, असे एसएमआयएमईआर रुग्णालयाचे निवासी वैद्यकीय अधिकारी जयेश पटेल म्हणाले.