Punjab Haryana High Court: पंजाब-हरियाणा उच्च न्यायालयाने अतिशय महत्त्वाचा निर्णय देताना स्पष्ट केले की, केवळ सुसाईड नोटमधील नावाच्या आधारे आत्महत्येस प्रवृत्त केल्याबद्दल दोषी ठरवले जाऊ शकत नाही. अशाच एका प्रकरणात, उच्च न्यायालयाने सोनीपत जिल्हा न्यायालयाने सुनावलेला 5 वर्षांच्या शिक्षेचा आदेश बाजूला ठेवत याचिकाकर्त्याची सुटका करण्याचे आदेश दिले आहेत.

दरम्यान, सोनीपत येथील रहिवासी असलेल्या रवी भारती यांनी उच्च न्यायालयात याचिका दाखल करताना आत्महत्येस प्रवृत्त केल्याप्रकरणी जिल्हा न्यायालयाने सुनावलेल्या 5 वर्षांच्या शिक्षेला उच्च न्यायालयात (High Court) आव्हान दिले होते.

दुसरीकडे, याचिकाकर्त्याने म्हटले आहे की, केवळ सुसाइड नोटमधील नावाच्या आधारे, सोनीपत जिल्हा न्यायालयाने याचिकाकर्त्याला 2 मे 2022 रोजी दोषी ठरवले. विषारी द्रव्य प्राशन केल्याने त्या व्यक्तीचा मृत्यू झाल्याचे याचिकाकर्त्याने नमूद केले.

तसेच, सर्व पक्षकारांचे म्हणणे ऐकून घेतल्यानंतर न्यायालयाने याचिकाकर्त्याचे अपील मान्य केले. केवळ सुसाईड नोटमधील नावाच्या आधारे कोणालाही दोषी ठरवता येणार नाही, असे निरिक्षण न्यायालयाने नोंदवले. या खटल्याचा निकाल देताना न्यायालयाने आरोपीचा मृत व्यक्तीशी काय संबंध आहे, आत्महत्येस (Suicide) प्रवृत्त करण्याचे कारण काय आणि सुसाईड नोटमध्ये दिलेले कारण खरोखरच एखाद्याला आत्महत्येस प्रवृत्त करु शकते का, हे लक्षात घेतले पाहिजे.

शिवाय, हॅडराइटिंग एक्सपर्टचा सल्ला घेतल्यानंतरच तपास अधिकाऱ्याने पुढे जावे, असे न्यायालयाने म्हटले आहे. ही निरीक्षणे नोंदवून उच्च न्यायालयाने अपील मंजूर करुन याचिकाकर्त्याच्या सुटकेचे आदेश दिले.