मध्य प्रदेशातील रीवाचे खासदार जनार्दन मिश्रा यांचा एक व्हिडिओ सोशल मीडियावर प्रचंड प्रमाणात व्हायरल होत आहे. या व्हिडीओमध्ये ते अस्वच्छ शौचालय साफ करताना दिसत आहेत. स्वतः खासदारानी हा व्हिडिओ सोशल मीडियावर शेअर केला आहे. यावर लोक कमेंटचा भडिमार करत आहेत. सोशल मीडियावर हा व्हिडिओ व्हायरल (Viral Video) झाल्यानंतर भाजपमध्ये खळबळ उडाली आहे.

मिळालेल्या माहितीनुसार खासदार जनार्दन मिश्रा (Janardan Mishra) पीएम मोदी (PM Modi) यांच्या वाढदिवसानिमित्त मौगंज विधानसभा मतदारसंघातील हनुमाना येथील खातखरी युवा मंडळाकडून आयोजित वृक्षारोपण कार्यक्रमात सहभागी होण्यासाठी गेले होते. त्यावेळी त्यांना शाळेची पाहणी करताना शाळेतील स्वच्छतागृह अस्वच्छ असल्याचे निदर्शनास आले. तेव्हा त्यांनी पाहता क्षणाचाही विलंब न करता शौचालय स्वच्छ करण्यास सुरूवात केली.

स्वच्छता करताचा हा व्हिडिओ स्वतः सोशल मीडियावर (Social Media) पोस्ट केला आहे. त्यावर अनेकांनी कमेंट्स केल्या असून, सध्या त्यांंचा हा व्हिडिओ चर्चेचा विषय ठरला आहे. मिश्रा यांनी अशा प्रकारे शौचालय स्वतः स्वच्छ केल्याचा पहिल्यांदा घडलेले नसून, त्यांनी याआधीही अनेकदा शौचालये स्वच्छ करून नागरिकांना स्वच्छतेचा संदेश दिला आहे. 2014 मध्ये मिश्रा यांना स्वच्छतेचे ब्रँड अॅम्बेसेडर बनवण्यात आले होते.