Bihar: बिहारमधून एक धक्कादायक घटना समोर आली आहे. भागलपूर जिल्ह्यात चालत्या ट्रेनमधून पडल्याने एका व्यक्तीला हात गमवावा लागला, असे एका अधिकाऱ्याने सांगितले.

रविवारी रात्री सुलतानगंज रेल्वे स्थानकावर ही घटना घडली. या घटनेनंतर फुली डुमर गावातील सुमन कुमार यादवने तुटलेला हात घेऊन हॉस्पिटलकडे गाठले.

दरम्यान, सुलतानगंज रेल्वे पोलिस स्टेशनच्या स्थानिक जीआरपी कर्मचाऱ्यांनी पीडित व्यक्तीची भेट घेतली आणि त्याला सुलतानगंज येथील रेफरल हॉस्पिटलमध्ये दाखल केले.

प्राथमिक उपचारानंतर डॉक्टरांनी (Doctors) त्याला पुढील उपचारासाठी जेएलएन मेडिकल कॉलेज आणि हॉस्पिटल, भागलपूर येथे हालवले आहे.

“चालत्या ट्रेनमधून पडलेल्या आणि हात गमावलेल्या एका व्यक्तीला आम्ही वाचवले आहे. त्याला रुग्णालयात तात्काळ दाखल करण्यात आले आहे.

त्याचबरोबर पीडित व्यक्तीच्या कुटुंबीयांना अपघाताविषयी कळवण्यात आले आहे,” असे जीआरपी सुलतानगंजचे एसएचओ यांनी सांगितले.

दुसरीकडे, या वर्षी ऑगस्टमध्ये मध्य प्रदेशातील (Madhya Pradesh) खरगोनमध्ये एका 4 वर्षीय मुलीचा हात मोटारसायकलच्या चाकात अडकल्याने तुटला होता. तुटलेला हात एका पिशवीत घेऊन कुटुंबीयांनी जखमी मुलीला जवळच्या रुग्णालयात दाखल केले होते.

खरगोन जिल्ह्यातील चित्तोडगड-भुसावळ राज्य महामार्गावर हा अपघात झाला होता. शहरातील एका खासगी रुग्णालयात प्राथमिक उपचार केल्यानंतर मुलीला इंदूरला रेफर करण्यात आले होते.