Madhya Pradesh Crime News : होळी हा सर्वांचाच आवडता सण आहे. रंगांची उधळण करत सर्वजण आनंदाने होळी साजरी करतात. पण हलीकडे मद्य किंवा भांग पिऊन होळी साजरी करण्याची जणू प्रथाच पडली आहे. मध्य प्रदेशातील (Madhya Pradesh) इंदूरच्या बाणगंगा पोलीस ठाण्याच्या हद्दीत मद्य पिऊन होळीच्या पार्टीमध्ये नाचणाऱ्या तरुणाबाबत एक अपघात घडला आहे ज्यामुळे त्याचा मृत्यू झाला आहे.

मध्य प्रदेशातील एक तरुण मद्याधुंद अवस्थेत होळी (Holi) साजरी करत होता, मात्र त्याला याची किंमत मोजावी लागली आहे. पार्टीमध्ये नाचताना या तरुणाने स्वत:लाच इजा करून घेतली आहे. होळी खेळण्याच्या नादात तल्लीन होऊन त्याने स्वतःच्या छातीवर चाकूने सपासप वार केले. त्यानंतर जखमी अवस्थेत त्याला रुग्णालयात दाखल करण्यात आले. पण त्याचा उपचारादरम्यान मृत्यू झाला. या घटनेचे सीसीटीव्ही फुटेज समोर आले असून ते सोशल मीडियावर व्हायरल होत आहे.

सुरुवातीला नाचता नाचता अचानक त्याने हातात चाकू घेतला आणि स्वतःच्याच छातीवर वार करण्याची अॅक्टिंग करु लागला. पण तो चाकू तरुणाच्या छातीत आरपार गेला आणि तो तरुण गंभीर जखमी झाला. क्षणार्धातच तो रक्तबंबाळ झाला. उपस्थितांनी तत्काळ त्याला रुग्णालयात दाखल केलं.