Jama Masjid: जामा मशिदीत महिलांच्या प्रवेशावर बंदी घालण्याच्या मुद्द्यावरुन दिल्ली महिला आयोगाने मशिदीच्या इमामाला नोटीस बजावण्याचा निर्णय घेतला आहे. दिल्ली महिला आयोगाच्या अध्यक्षा स्वाती मालीवाला यांनी स्वतः ट्विट करुन याची माहिती दिली आहे.

स्वाती मालीवाल (Swati Maliwal) म्हणाल्या की, 'जामा मशिदीत महिलांचा (Women) प्रवेश बंद करण्याचा निर्णय पूर्णपणे चुकीचा आहे. पूजेचा जितका अधिकार पुरुषाला आहे, तितकाच स्त्रीलाही आहे. मी जामा मशिदीच्या इमामाला नोटीस बजावत आहे. महिलांच्या प्रवेशावर अशा प्रकारे बंदी घालण्याचा अधिकार कोणालाही नाही.'

जामा मशिदीच्या तीनही प्रवेशद्वारांवर एक सूचना फलक लावण्यात आला आहे, ज्यावर 'जामा मशिदीत एकटी मुलगी किंवा मुलींचा प्रवेश निषिद्ध आहे', असे लिहिले आहे.

शाही इमाम यांचे काय म्हणणे आहे?

मीडिया रिपोर्ट्सनुसार, जामा मशिदीचे शाही इमाम सय्यद अहमद बुखारी सांगतात की, 'मुली (Girl) आपल्या बॉयफ्रेंडसोबत मशिदीत येतात अशा तक्रारी येत होत्या. त्यामुळे अशा मुलींना एकट्याने येण्यावर बंदी घालण्यात आली आहे.'

शाही इमाम पुढे म्हणाले की, 'जर एखाद्या महिलेला जामा मशिदीत यायचे असेल तर तिला तिच्या कुटुंबीयांसह किंवा पतीसोबत यावे लागेल.' नमाज पठणासाठी येणाऱ्या महिलेला रोखले जाणार नसल्याचे त्यांनी स्पष्ट केले.