Madhya Pradesh Crime: मध्य प्रदेशातील नर्मदापुरम जिल्ह्यातील माखन नगरमध्ये तीन तरुणांना बेदम मारहाण केल्याची घटना समोर आली आहे. गावकऱ्यांनी तरुणांना बेदम मारहाण केली. या मारहाणीचा व्हिडीओ व्हायरल झाल्यानंतर लोकांकडून अशा प्रकारची शिक्षा व्हायला हवी, असे म्हटले जात आहे.

गावकऱ्यांनी या तिघांना अमानुषपणे लाठ्या-काठ्यांनी मारहाण केली. मारहाणीची घटना 13 जुलैची सांगितली जात आहे. घटनेचा व्हिडिओ सोशल मीडियावर व्हायरल होत आहे.

दरम्यान, व्हिडिओ समोर आल्यानंतर माखन नगर पोलिसांनी (Police) 6 आरोपींविरुद्ध गुन्हा दाखल केला. तीनही जखमी तरुण जावळी गावचे रहिवासी आहेत. जखमी तरुणांवर गुन्हेही नोंद आहेत, त्यापैकी एक तरुण जिलाबदर येथे राहत होता. तिघेही तरुण बदमाश असून ते गावकऱ्यांना त्रास देत होते, असेही सांगण्यात येत आहे.

तीन तरुणांचे हातपाय बांधून लाठ्या काठ्यांनी मारहाण

दुसरीकडे, गुरुवारी दुपारीच अमजद अली उर्फ ​​गोगा, सौरभ नागवशी आणि पिन्नू नागवशी हे युवक गावातील लल्लू मामूच्या दुकानाजवळ उभे होते. दरम्यान, ते गावकऱ्यांना अश्लील शेरेबाजी करत होते. यानंतर गावातील रहिवासी बलराम सौर. दिलीप सौर, विक्रम सौर, कन्हैया सौर, सोनू सौर आणि सुमित सौर यांनी मिळून तिघांचेही पाय बांधून त्यांना जमिनीवर झोपवले आणि बेदम मारहाण केली.

तरुणांचे हात आणि पाय फ्रॅक्चर

व्हायरल झालेल्या व्हिडिओमध्ये असे दिसून येते की, तिन्ही तरुण अर्धनग्न असून त्यांचे पाय बांधलेले आहेत. 5-6 लोक लाठ्या-काठ्यांनी मारहाण करत आहेत. मोठा जमाव हा तमाशा पाहत आहे. दरम्यान त्यांना वाचवण्याचा कोणीही प्रयत्न केला नाही.

सूत्रांनी दिलेल्या माहितीनुसार, या तरुणांना सुमारे एक तास मारहाण करण्यात आली. यानंतर त्यांना रुग्णालयात नेण्यात आले. तेथून तिघांनाही जिल्हा रुग्णालयात (Hospital) नेण्यात आले. तरुणांच्या हाताला आणि पायाला फ्रॅक्चर झाले आहे.