Shahzad Bhatti Terror Network Busted: केंद्रीय गृहमंत्री अमित शाह यांनी सोमवारी एका महत्त्वपूर्ण मोहिमेची माहिती देताना सांगितले की, स्वातंत्रदिनापूर्वी भारतीय सुरक्षा यंत्रणांनी आयएसआय (ISI) समर्थित ‘शहजाद भट्टी नेटवर्क’ या दहशतवादी सिंडिकेटचा पर्दाफाश करत मोठा कट उधळला. देशातील 14 राज्यांमध्ये राबवलेल्या एका अत्यंत समन्वयी आणि धाडसी कारवाईत या नेटवर्कच्या 200 हून अधिक ऑपरेटर आणि संशयितांना अटक करण्यात आली. गृह मंत्रालयाने जारी केलेल्या अधिकृत प्रसिद्धी पत्रकानुसार, या कारवाईदरम्यान देशभरातून 253 जणांना ताब्यात घेण्यात आले असून 80 पेक्षा जास्त एफआयआर (FIR) नोंदवण्यात आले.

गृहमंत्री शाह यांनी ‘एक्स’वर दिलेल्या माहितीनुसार, मोदी सरकारच्या दहशतवादाविरोधातील ‘झिरो टॉलरन्स’ धोरणाचा हा एक उत्तम पुरावा आहे. भारतीय सुरक्षा यंत्रणांनी 14 राज्यांमध्ये एकाच वेळी ही व्यापक मोहीम राबवून या खतरनाक दहशतवादी नेटवर्कची पाळेमुळे उखडून टाकली. या मोहिमेदरम्यान पाकिस्तानी ऑर्डनन्स फॅक्टरीचे शिक्के असलेले ग्रेनेड्स, आयईडी, अत्याधुनिक पिस्तूल, जिवंत काडतुसे आणि हेरगिरीसाठी वापरले जाणारे सीसीटीव्ही कॅमेरे जप्त करण्यात आले.

पाकिस्तानमधून (Pakistan) कार्यरत असणारे शहजाद भट्टी नेटवर्क भारतात ग्रेनेड हल्ले, आयईडी स्फोट, पेट्रोल बॉम्ब आणि टार्गेट किलिंगसारख्या गंभीर गुन्ह्यांमध्ये सक्रिय होते. एवढेच नव्हे तर हे नेटवर्क स्थानिक लोकांना पैशांचे आमिष दाखवून पोलीस ठाणे, संरक्षण क्षेत्रे आणि धार्मिक स्थळांची रेकी करणे तसेच हेरगिरीसाठी गुप्त कॅमेरे बसवण्याचे काम करत होते.

12 ऑगस्ट रोजी गुप्तचर यंत्रणा आणि विविध राज्यांच्या पोलीस दलांनी रिअल-टाइम इंटेलिजन्स शेअरिंग सिस्टीमचा वापर करुन ही संयुक्त कारवाई केली. यात उत्तर प्रदेश (62), हरियाणा (52), दिल्ली (51), पंजाब (44), राजस्थान (15), महाराष्ट्र (8) आणि उत्तराखंड (5) यासह गुजरात, बिहार, कर्नाटक, तेलंगणा, हिमाचल प्रदेश, जम्मू-कश्मीर आणि केरळ या राज्यांमधून संशयितांना पकडण्यात आले. स्वातंत्रदिनाआधी घडवलेला हा मोठा कट वेळेत हाणून पाडल्यामुळे देशावर घोंगावणारे एक मोठे संकट टळले.