उत्तर प्रदेश: गोव्याहून परतत असताना अकरावीत शिकणाऱ्या 16 वर्षीय मुलाचा मृत्यू झाला आहे. मुरादाबादचे माजी वैद्यकीय अधिकारी डॉ. विनय कुमार आर्य यांचा हा एकुलता एक मुलगा होता. अन्नातून विषबाधा आणि शरीरातील साखरेची पातळी 500 पेक्षा जास्त वाढल्याने मृत्यू झाल्याचे शवविच्छेदन अहवालातून स्पष्ट झाले आहे.

प्रखर आर्य (16) असे या मृत मुलाचे नाव आहे. गोव्याहून परतत असताना वाटेतच त्याचा मृत्यू झाला. प्रखर हा डॉ.विनय यांचा एकुलता एक मुलगा होता. मुलाव्यतिरिक्त त्यांना दोन लहान मुली देखील आहेत. मुलाच्या निधनाने आर्य कुटुंबावर शोककळा पसरली आहे. पीडितेचे कुटुंब मूळचे कुंडरकी, मुरादाबाद येथील आहे.

एका प्रसिद्ध हिंदी वृत्तपत्राने दिलेल्या वृत्तानुसार, डॉ. विनय कुमार आर्य आणि त्यांचा मित्र कमल छाबरा आपापल्या कुटुंबासह गोव्याला गेले होते. तेथून ते परतत असताना प्रखर आर्य याची प्रकृती वाटेतच खालावली.

ग्वाल्हेरला पोहोचल्यावर त्याला पोटदुखीचा त्रास व्हायला लागला. रुग्णालयात दाखल केले असता पुढील उपचारासाठी त्याला दुसरीकडे रेफर करण्यात आले. दरम्यान, त्याला गुडगावला घेऊन जात असताना वाटेतच त्याचा मृत्यू झाला.

प्रखर हा उत्तराखंडच्या डीपीएस स्कूलमध्ये इयत्ता 11 वीचा विद्यार्थी होता. 3 जानेवारी रोजी तो कुटुंबासह गोव्याला गेला होता. रविवारी त्यांचा मृतदेह रुग्णवाहिकेतून बिलासपूरला घरी आणण्यात आला.