सांस्कृतिक प्रतिनिधी

हिंदवी स्वराज्याचे प्रेरणास्थान, आदर्श राजा छत्रपती शिवाजी महाराज यांच्या शिवराज्याभिषेकाला साडेतिनशे वर्षे पूर्ण झाली. त्याचे औचित्य साधून फोंडा येथील ‘हिंदवी स्वराज संघटने’ने पाटो-पणजी येथील संस्कृती भवन मधील कला दालनात भरविलेल्या प्रदर्शनाचे मंगळवारी उदघाटन झाले.

गोव्यातील 23 प्रतिभावंत चित्रकारांनी रेखाटलेली शिवरायांची विविध रूपे, शिवकालीन प्रसंगांचा प्रतिकात्मक आविष्कार पहाणे म्हणजे आंनदानुभूतीच. हे प्रदर्शन पहाताना ऊर अभिमानाने भरून येते.

सागर नाईक मुळे, वितेश नाईक, विराज नाईक, राजेश साळगावकर, सचिन नाईक, वासुदेव शेट्ये, आदी विशाल, विजय भंडारे, रामदास गडेकर, स्वप्नेश वायंगणकर,श्रीधर कामत बांबोळकर,चैताली मोरजकर, प्रविण नाईक, डॉ. शिवाजी शेट, ईशान नाईक, श्रीपाद गुरव, सिद्धार्थ गायतोंडे, सोनिया रॉड्रिगीस सबरवाल, संतोष मोरजकर, शिल्पा नाईक मोरजकर, प्रदीप नाईक, सिद्धार्थ गोसावी व निरुपा नाईक या दिग्गज गोमंतकिय चित्रकारांनी ही चित्रे रंगवली आहेत.

सागर नाईक मुळे यांनी मंदिराची पार्श्वभूमी घेऊन शिवप्रतिमा साकारली आहे. विजय भण्दारे यांनी शिवाजीने अफझलखानाचा कोथळा काढला त्या प्रसंगावर वाघनखे घातलेला रक्ताळलेला हात दाखवून प्रतिकात्मक आविष्कार घडविला आहे.

चैताली यांनी तोंडात सुरा असलेला घोडा आणि मागे किल्ला अशी कल्पक चित्रकृती साकारली आहे. डॉ. शिवाजी शेट यांनी विरश्रीयुक्त रणमैदानावरील शिव प्रतिमा छान साकारली आहे.

निरुपा नाईक यांची साकारलेली कल्पक आणि कलात्मक शिवप्रतिमा लक्षवेधी आहे. वासुदेव शेट्ये यांची कोलाजसदृश्य प्रतिमा आणि विराज नाईक आणि प्रविण नाईक यांच्या चित्रकृती प्रभावी आहेत. हे प्रदर्शन गुरुवार, 8 जून पर्यंत रसिकांसाठी खुले आहे.