Mahila Samman Savings Certificate: देशभरातील महिलांसाठी एक आनंदाची बातमी आहे. अर्थ मंत्रालयाने सर्व सार्वजनिक क्षेत्रातील बँकांना आणि पात्र खाजगी क्षेत्रातील बँकांना महिला सन्मान बचत प्रमाणपत्र, 2023 ची अंमलबजावणी आणि विक्री करण्यास परवानगी दिली आहे.
म्हणजेच आता तुम्ही कोणत्याही खाजगी आणि सरकारी बँकेत या योजनेचा लाभ घेऊ शकता. यासाठी तुम्हाला फक्त पोस्ट ऑफिसमध्ये जाण्याची गरज नाही.
अर्थ मंत्रालयाच्या आर्थिक व्यवहार विभागाने 27 जून 2023 रोजी जारी केलेल्या ई-गॅझेट अधिसूचनेद्वारे हे नियम जारी केले आहेत.
अर्थ मंत्रालयाने शुक्रवारी एका निवेदनात म्हटले आहे की, या योजनेचा मुली/महिलांपर्यंत पोहोच वाढवण्यास मदत करण्याच्या उद्देशाने हे पाऊल उचलण्यात आले आहे. अशा प्रकारे, महिला सन्मान बचत प्रमाणपत्र योजनेचे सदस्यत्व आता पोस्ट ऑफिससह पात्र शेड्युल्ड बँकांमध्ये घेता येईल.
महिलांमध्ये बचतीला प्रोत्साहन देण्यासाठी सुरु केलेली ही योजना 1 एप्रिल 2023 पासून पोस्ट विभागामार्फत लागू आहे.
देशातील प्रत्येक मुलीला आणि महिलेला आर्थिक सुरक्षा देण्यासाठी केंद्र सरकारने 2023-24 या आर्थिक वर्षाच्या सर्वसाधारण अर्थसंकल्पात (Budget) महिला सन्मान बचत प्रमाणपत्र 2023 योजना जाहीर केली होती.
या योजनेअंतर्गत, जमा केलेल्या रकमेवर वार्षिक 7.5 टक्के दराने व्याज दिले जाईल, जे तिमाही आधारावर जोडले जाईल. अशा प्रकारे प्रभावी व्याज दर सुमारे 7.7 टक्के असेल.
त्याचबरोबर, 100 च्या पटीत कोणतीही रक्कम किमान रु. 1000 आणि कमाल रु. 2 लाखांच्या मर्यादेत जमा केली जाऊ शकते. या योजनेतील गुंतवणुकीची (Investment) परिपक्वता ही योजनेअंतर्गत खाते उघडण्याच्या तारखेपासून दोन वर्षांची आहे. या योजनेअंतर्गत, 31 मार्च 2025 किंवा त्यापूर्वी दोन वर्षांच्या कालावधीसाठी खाते उघडता येते.
दैनिक गोमंतकचे सदस्य व्हा
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.