Vande Bharat Express: भारतीय रेल्वेची ऑगस्ट 2023 पर्यंत देशातील 75 शहरे वंदे भारत सेमी-हाय स्पीड ट्रेनने जोडण्याची योजना आहे. सध्या देशातील पाच वेगवेगळ्या मार्गांवर वंदे भारत गाड्या चालवल्या जात आहेत. या गाड्या सुरु झाल्याने प्रवाशांची मोठी सोय झाली आहे. आता कमी वेळात जास्त अंतर कापता येते. आगामी काळात इंटरसिटी आणि शताब्दी एक्स्प्रेसची जागा वंदे भारत गाड्या घेतली, असा दावा अनेक मीडिया रिपोर्ट्समध्ये करण्यात आला होता.

ट्रेनचा वेग कमी करण्याची गरज नाही

येत्या काळात वंदे भारत ट्रेनचा (Vande Bharat Train) वेग आणखी वाढवण्यासाठी रेल्वे मंत्रालय तंत्रज्ञानात बदल करण्याचा विचार करत आहे. यामुळे वळणावर ट्रेनचा वेग कमी करण्याची गरज भासणार नाही. रेल्वे मंत्रालयाकडून येणाऱ्या गाड्यांपैकी एक चतुर्थांश गाड्यांमध्ये नवीन तंत्रज्ञानाचा वापर केला जाईल. त्यामुळे रेल्वेला लांबचे अंतर कापण्यासाठी पूर्वीपेक्षा कमी वेळ लागणार आहे.

ट्रेनचा सरासरी वेग कमी होतो

आता वक्र ट्रॅकवर ट्रेनचा वेग कमी करावा लागतो. त्यामुळे ट्रेनचा सरासरी वेग कमी होऊन ट्रेनला जास्त वेळ लागतो. नवीन तंत्रज्ञानाच्या वापरामुळे ट्रेनला वक्र ट्रॅकवरुन वेगाने जाणे शक्य होणार आहे. सूत्रांकडून मिळालेल्या माहितीनुसार, वंदे भारत ट्रेन (Train) सध्याच्या ट्रॅकवरच 'टिल्ट टेक्नॉलॉजी'ने चालवण्याची तयारी सुरु आहे.

तसेच, आगामी काळात देशभरात 400 वंदे भारत ट्रेन चालवण्याची रेल्वे मंत्रालयाची योजना आहे. या 400 गाड्यांपैकी 100 लांब पल्ल्याच्या गाड्यांमध्ये 'टिल्ट टेक्नॉलॉजी' वापरण्यात येणार आहे. सध्या इटली, रशिया (Russia), स्वित्झर्लंड, चीन, जर्मनी इत्यादी देशांमध्ये या तंत्रज्ञानावर ट्रेन धावत आहेत.