Unemployment Allowance In Chhattisgarh: तुम्ही बेरोजगार तरुण असाल तर तुमच्यासाठी सरकारकडून एक दिलासादायक बातमी आहे. प्रजासत्ताक दिनानिमित्त छत्तीसगड सरकारने तरुणांसाठी बेरोजगारी भत्ता जाहीर केला आहे.

राज्याचे मुख्यमंत्री भूपेश बघेल यांनी राज्यातील बेरोजगार तरुणांना दर महिन्याला बेरोजगारी भत्ता देण्याची घोषणा केली आहे. बघेल यांनी ट्विट करुन पुढील आर्थिक वर्षापासून हा भत्ता दिला जाईल, असे सांगितले. 2018 च्या निवडणूक प्रचारादरम्यान काँग्रेसने बेरोजगार भत्त्याचे आश्वासन दिले होते.

15 वर्षांनंतर काँग्रेस पुन्हा सत्तेत आली

या निवडणुकीतील आश्वासनाच्या जोरावर काँग्रेस पक्ष 15 वर्षांनंतर पुन्हा सत्तेत आला. पक्षाच्या वतीने येत्या आर्थिक वर्षापासून बेरोजगार तरुणांना बेरोजगारी भत्ता देण्याची घोषणा करण्यात आली आहे.

आगामी विधानसभा निवडणुकीच्या पार्श्वभूमीवर प्रत्येक महिन्याला 2500 रुपये बेरोजगार भत्ता जाहीर करण्यात आला आहे. या योजनेसाठी सरकार (Government) सध्या निकष, रक्कम आणि अर्थसंकल्पीय वाटप यावर काम करत असल्याचे सूत्रांनी सांगितले.

तसेच, सरकारी अधिकारी सध्या बेरोजगार भत्त्यासाठी राजस्थान मॉडेलचा अभ्यास करत आहेत. राजस्थान सरकार 2019 पासून तरुणांना 'मुख्यमंत्री युवा संबल योजने' अंतर्गत बेरोजगारी भत्ता देत आहे. छत्तीसगडवर (Chhattisgarh) सकल देशांतर्गत उत्पादनाच्या (GDP) 26.2% कर्ज आहे. याशिवाय, मुख्यमंत्र्यांनी मजूर आणि महिलांसाठी अनेक लोककल्याणकारी योजनांची घोषणा केली.