Valpoi: वाळपईत भाडेकरू पडताळणी; 4 जणांना अटक

वाळपई: भाडेकरूंविरोधात सुरू असलेल्या पडताळणी मोहिमेला वाळपई पोलिसांनी पुन्हा एकदा वेग दिला आहे. रविवारी आणि सोमवारी पालिका प्रभाग क्रमांक ९ मध्ये ही मोहीम राबवण्यात आली. रात्री उशिरापर्यंत भाडेकरूंची चौकशी करून त्यांची सखोल चौकशी करण्यात आली.

उत्तर गोवा पोलिस अधीक्षक यांच्या आदेशानुसार वाळपईत एक विशेष पोलिस पथक तैनात करण्यात आले असून या पथकासोबत वाळपई पोलिसांनी ही कारवाई राबवली. वाळपईसह होंडा, केरी आणि सत्तरी तालुक्यातील इतर भागांमध्ये टप्प्याटप्प्याने ही पडताळणी मोहीम सुरू आहे.

गेल्या काही महिन्यांत या मोहिमेद्वारे २,००० हून अधिक भाडेकरूंवर कारवाई करण्यात आलेली आहे. सत्तरीत परप्रांतीयांची संख्या वाढली असून अनेकजण भाड्याने घरे घेऊन वास्तव्य करीत आहेत.

रविवारी मोहिमेदरम्यान ४ जणांना तर सोमवारी प्रभाग ९ मधून १० जणांना चौकशीसाठी पोलिस ठाण्यात आणण्यात आले. त्यांच्याकडे कोणतेही वैध कागदपत्र नसल्यामुळे त्यांच्यावर आवश्‍यक कारवाई करण्यात आली.