Ponda: कोने-प्रियोळ येथे धावत्या स्कुटीला अचानक आग, पाहता-पाहता जळून खाक

फोंडा तालुक्यातील कोने-प्रियोळ परिसरात सोमवारी दुपारी एक धक्कादायक घटना घडली. धावत्या स्कुटरला अचानक आग लागल्याने काही काळ परिसरात खळबळ उडाली. सुदैवाने स्कुटर चालकाने तत्काळ प्रसंगावधान दाखविल्याने मोठा अपघात टळला असून चालक सुखरूप बचावला आहे.

मिळालेल्या माहितीनुसार, एक युवक फोंडा येथून कुंडईकडे आपल्या स्कुटरने जात होता. प्रवासादरम्यान अचानक स्कुटरमधून धूर निघू लागला. ही बाब मागून येणाऱ्या एका वाहनचालकाच्या लक्षात आली. त्याने तातडीने स्कुटर चालकाला इशारा दिला. त्वरित स्कुटर रस्त्याच्या कडेला थांबविण्यात आली. त्यानंतर काही क्षणांतच स्कुटरला भीषण आग लागली.

दरम्यान, परिसरात उपस्थित नागरिकांनी तत्काळ अग्निशमन दलाला माहिती दिली. काही वेळातच अग्निशमन दलाचे जवान घटनास्थळी दाखल झाले. त्यांनी आग विझविण्याचे प्रयत्न करून ती नियंत्रणात आणली.