Goa Accident: दोन वेगवेगळ्या अपघातात दोन युवकांचा मृत्यू; एकजण जखमी

फोंडा: देवसडा धारबांदोडा रस्त्यावर शुक्रवारी (05 सप्टेंबर) सकाळी अकराच्या सुमारास दुचाकी ट्रक अपघातात दुचाकीस्वार तुषार नाईक (वय २०) हा युवक ठार झाला, तर दुचाकीवरील दुसरा स्वार अभिषेक गावकर (वय २०) हा गंभीर जखमी झाला. दोन्ही युवक किलंपाल दाभाळ येथील रहिवासी आहेत.

तुषार नाईक व अभिषेक गावकर हे दोघेही मित्र असून जीए १२ बी ६८१८ या क्रमांकाच्या दुचाकीने ते चालले होते. देवसडा येथे साकवाजवळ पोचल्यावर समोर वळणावरून अचानक आलेल्या केए०८ ए ०३७९ क्रमांकाच्या मालवाहू ट्रकच्या टायरला दुचाकीची किंचित धडक बसल्याने दुचाकीसह दोघेही रस्त्यावर फेकले गेले. अपघात झाल्याचे पाहून ट्रकचालक घटनास्थळाहून पळाला. तसेच, म्हापसा येथे झालेल्या दुचाकीच्या अपघातात समीर नाईक या युवकाचा मृत्यू झाला आहे.